Nos a tuma nota di e declaracion di Presidente di Parlamento den cual e kier hustifica e decicion eroneo di saca nos como representante di Pueblo den opocicion for di Sala di Parlamento. Segun e Presidente ela saca nos afor pa motibo cu nos lo tabata grosero, vulgar, a stroba Minister Dowers di papia y a duna nos varios waarschuwing. E ta un berguensa cu e Presidente mester recuri na tanto gañamento pa purba hustifica su eror ya cu no tabata tin ningun motibo valido pa saca un Parlamentario di opocicion for di Parlamento.

Dowers su disertacion
Nos a tira palabra pa Minister Dowers na momento cu e tabata abusa di nos Lider y di nos fraccion yamando nos pa gañado y pa hende cu ta probecha di dolor ageno, pero na ningun momento esaki a stroba Minister Dowers di hiba palabra. A bisa e mandatario cu e unico gañador ta su lider Mike Eman y cu nos no ta abusa di hende su dolor, nos como representante di Pueblo ta trece nan dolor y preocupacion dilanti. Ta e berdad aki ta locual a pone e Presidente duna nos un waarschuwing.

Varios waarschuwing
Ta un waarschuwing e Presidente a duna y a ripiti cu ela duna un waarschuwing caba y despues di biaha a pidi nos pa bandona e Sala di Parlamento. Ora nos a cuestione a base di kiko e ta saca nos y cu nos a nenga di sali, ela core yama Polis pa saca of manera e Presidente a expresa pa laga nan carga saca nos afor di Parlamento. Pesey ora cu e Presidente ta purba hustifica su eror door di bisa cu ta varios waarschuwing ela duna, e Presidente aki ta simplemente gaña. Y tur esaki ta graba pa Pueblo mes por comproba e berdad.

Groseria y vulgaridad
E Presidente ta tilda nos di ta grosero y vulgar, siendo cu nos no a usa palabra malo ni denigrante den direccion di ningun hende den e Sala di Parlamento, pues aki atrobe e Presidente ta bon ekiboca. Si e kier papia di groseria y vulgaridad, anto e Presidente mester pone un spiel su dilanti pa wak kiko e ta haci sinta riba e stul ey y con grosero e ta expresa su mes vooral ora ta trata di e damanan di MEP. Pasobra sigur pa locual ta vulgaridad, ni den palabra y tampoco den vestimenta nos ta vulgar. Kizas pa e critica di vulgaridad tambe lo ta bon pa Presidente di Parlamento tira un bista den spiel.

Ta midi cu diferente midi
E ta bisto cu e Presidente di Parlamento ta partidista y ta midi cu diferente midi specialmente ora cu ta trata di su hendenan di partido. Pasobra ora cu Baba a ofende e Presidente usando e ‘f word, ’ ora cu su colleganan a yama nos pa porco, porkaria, bestia, corupto, ladron, ora cu Minister a ofende mama di parlamentario di MEP, ora parlamentario di AVP kier mustra dama di opocicion su parti priva, ora publico a parti t-shirt politico den tribuna, ora publico den tribuna ofende parlamentario y tira cos riba nos, e ora ey si e Presidente no a tipifica e comportacionnan aki como groseria y vulgaridad y sigur no a bay yama Polis pa saca nan afor. Esaki ta bolbe mustra cu e Presidente di Parlamento NO SA SU TRABOU, ta midi cu diferente midi y no tabata tin ningun motibo valido pa saca Parlamentario di opocicion for di Parlamento.

22 december 2015

Expresionnan haci den e articulo aki no necesariamente ta refleha opinion di ArenaPoliti.co