Un multitud a sostene Festival di Dande na Linear Park  

Festival di Dande a kibra tur expectativa y un multitud a sa di yega Linear Park pa sostene nos tradicion musical.
Minister di Cultura, Otmar Oduber a indica cu hopi orguyo cu e fin di siman aki tabata uno hopi special unda nos musica, nos tradicionnan y nos cultura a resalta entre chikito y grandi. E decision di organiza Festival di Dande prome cu Pasco y na Linear Park cu entrada gratis a resulta un exito total. E combinacion di Pasco den Paraiso hunto cu Festival di Dande a atrae un multitud masha grandi cu a disfruta di diferente aspecto tipico di nos isla.
Loke e mandatario ta resalta tambe, fuera di e cantidad di hende cu tabata presente, ta e hecho cu por mira cu e diferente generacionnan ta sigui carga nos Dande y ta hacie di curazon, presentando diferente cancionnan cu hopi inspiracion.
Diadomingo anochi tabata e anochi final y Minister Otmar Oduber a probecha e ocasion aki pa gradici y felicita tur participante y naturalmente Harry Croes y e comite organizador pa e evento exitoso. Tambe el a anuncia cu otro aña e Festival di Dande lo wordo realiza na Plaza Betico Croes cu lo ta totalmente renova den cuadro di celebracion di 30 aña di Status Aparte y 40 aña di nos Himno y Bandera. Publico presente a sostene e anuncio haci pa e mandatario totalmente.
Minister Oduber desde inicio a sa di sostene nos Festival di Dande totalmente y a inica cu el lo sigui haci esaki y ta contento di por mira con a traves di esaki ta traspasando nos cultura na e siguiente generacionnan.
Minister di Cultura a ricibi un bunita obra di arte den forma di cunucu como gradicimento pa su contribucion na Festival di Dande.

Expresionnan haci den e articulo aki no necesariamente ta refleha opinion di ArenaPoliti.co