Dialuna Parlamentarionan Ady Thijsen, Glenbert Croes y Xiomara Ruiz-Maduro di MEP tabata presente den e reunion Tripartiet na Sint Maarten hunto cu coleganan Parlamentario di Corsow y Sint Maarten. Durante e dia a trata diferente tema di interes pa e Paisnan presente. Entre nan, oportunidad economico den Reino, pago di debe di estudio DUO, reduccion costo di roaming entre e Paisnan den Caribe Hulandes y e geschillenregeling den caso di disputa den Reino.

Oportunidad economico 
Entre otro a toca e tema di oportunidad economico den Reino den cual e proyecto di fast ferry dentro di poco lo bira realidad pa asina bin transporte cu ferry entre Aruba, Curacao y Bonaire den e prome fase. Remarcabel ta cu durante e presentacion di e proyecto a sali na cla cu ta for di e waf di e refineria e fast ferry lo opera. Algo cu a trece e pregunta cune ta con Gabinete Eman kier logra re apertura di e refineria si kier usa e waf pa e fast ferry y mas bien ta confirma e duda cu ta existi cu si di berdad Gabinete Eman kier logra re aperture di e refineria
Debe di DUO 
Tin hopi ex studiante cu ta confronta problema ora di paga e debe di estudio haci na Hulanda via DUO. Pesey a busca manera pa yega na areglonan pa facilita e pagonan cu mester wordo haci. Durante e reunion a sali na cla cu hopi ex studiante ainda no a haci peticion pa e areglonan aki y cu kizas mas informacion mester wordo duna riba esaki.

Baha gasto di roaming
Un punto di agenda tambe ta pa e Paisnan purba yega na un areglo pa baha e gastonan di roaming. Aki a sirbi como ehempel e Resolucion di Cartagena presenta na Parlatino na november ultimo den cual e Paisnan a dicidi pa traha hunto pa por logra baha e gastonan di roaming pa nan cuidananon ora di biaha na e Paisnan cu sera acuerdo cu otro.

Geschillenregeling
E punto kizas mas importante y cu mas a wordo discuti ta e geschillenregeling pa ora cu tin un disputa den Reino. For di basta tempo caba MEP tabata boga pa un geschillenregeling asina caminda cu un organo inparcial ta evalua e decicion tuma pa e Gobierno di Reino. Na ocacion di 10-10-10 mes Parlamentarionan Thijsen y Wever a entrega un amienda den cual a exigi e geschillenregeling aki. A tarda 5 anja prome cu e fraccion di AVP a realisa su necesidad, y awor a bin para banda di MEP pa boga pa e geschillenregeling aki. Mester remarca cu si nos tabata tin e geschillenregeling aki caba, ya nos por tabata tin e confirmacion cu Gobernador a actua correctamente y cu Minister Eman a merece e KB pa su mal gobernacion.

Tur e puntonan aki lo wordo discuti den e sigiente dianan, hunto cu parlamentarionan di Hulanda.

Expresionnan haci den e articulo aki no necesariamente ta refleha opinion di ArenaPoliti.co