Awor cu Gabinete Mike Eman den su ansha y desesperacion a pospone tratamento di e presupuesto irealistico 2016 di pais Aruba te cu diamars awor, lo ta bon pa nan bay den reflexion den e proximo dianan aki y despues splica pueblo dicon den 2016 nan ta bolbe aumenta e gastonan di gobierno cu 9.1 miyon florin. Remarcabel ta cu den e Ministerio di Husticia nan ta bay corta un suma di 3.4 miyon florin y den e Ministerio di Salubridad nan lo corta tambe 12.5 miyon florin. Sinembargo mester constata cu di un banda Gabinete Eman ta corta drasticamente den salubridad publico, pero di otro banda y riba dje nan no ta traspasando miyones di florin di e primanan di BAZV pa e organo di AZV. Pues di tur banda e gobernantenan di AVP ta sinta chica y ta probecha na grandi di placa cu no ta pertenece na nan, pero placa di e aseguradonan.

Combatimento di criminalidad
Pa loke ta husticia, un biaha mas por mira den presupuesto 2016 cu Gabinete Eman no tin ningun intencion di construi wardanan di polis nobo, manera cu si a sosode durante e 8 aña di Gabinete Oduber. Alcontrario, e gobierno di AVP no ta bay construi ningun warda di polis, pero ta bay bende e Warda di Polis na Playa na un prijs di baca flaco, p’asina nan por haya poco placa pa cera e buraco den e presupuesto 2015. Hecho ta cu awe y te ainda tur hende por admira e Warda di Polis nobo pa e districto di Noord y e Ministerio di Husticia/Warda di Polis na Santa Cruz cu ta obranan di Gabinete Oduber. Tambe ora cu den pasado Gabinete Oduber tabata pone placa riba presupuesto pa institucion di Warda Nos Costa, Helicopter, Radarnan pa controla nos costanan y Visibility teams pa vigila e areanan di hotelnan, e gobierno di AVP ta keda kita placa for di presupuesto y p’asina logra elimina tur e proyectonan di gobierno di MEP cu ta destina pa combati criminalidad. Pues den algun palabra, cu mientras Gabinete Oduber tabata tey pa construi, Gabinete Eman ta goberna cu e unico meta pa destrui!

Cuido Medico y deporte
Pa loke ta e otro ministerio, esta di Salubridad y Deporte, mester constata cu Gabinete Eman durante e ultimo 6 añanan no a pone ningun florin den presupuesto pa sikiera construi un centro medico of policlinica den un of mas districto di Aruba y tambe ningun cen pa construi un of mas cancha y facilidad deportivo nobo den e districtonan. Nan mester tin berguensa si nan averigua pa nan mes e joya di Centro Medico Nobo San Nicolas y tambe e bunita proyectonan deportivo cu a ser construi durante e 8 aña di Gabinete Oduber, manera entre otro e Compleho deportivo Frans Figaroa y Sporthotel na Noord, e Parke deportivo y recreativo na Jaburibari, e facilidadnan deportivo na Simeon Antonio y Jara, e Parke di Baseball na Santa Cruz (ex-Winstonveld), e Little League Ball Park na Pos Chikito cu Gabinete Eman a boycotia, e Stadion di LIFIDA na Savaneta etc. Alavez ta bao di e mesun Gabinete Eman aki nan a malgasta placa sin limite di e Fundacion Lotto pa Deporte door di entre otro persigui Arubianonan decente cu amor pa deporte, te cu nan a haya nan mes obliga di hinca henter e fundacion aki den man di un institucion na Canada y asina logra cu gran parti di ganashi di Lotto ta wordo manda pa exterior, perhudicando nos deportistanan local.
Ta pesey partido MEP ta keda insisti cu e mentalidad di e gobernantenan di AVP ta anti un pueblo cu merece biba den siguridad, anti esnan cu mester di un cuido medico adecuado y tambe anti nos deportistanan local, ya cu nan ta goberna solamente pa wak con nan por sigui beneficia nan mes, nan famia, nan amigonan y nan enamoradonan.