Despues cu Diahuebs 27 di Augustus 2015 tawata un dia scur pa pais ARUBA unda e gobierno di AVP a entrega un parti grandi di nos autonomia, nos STATUS APARTE back na Hulanda. E Diahuebs ey a trata e ley di CAFT den parlamento. Pa por a logra un presupuesto balansa manera e acuerdo di CAFT ta prescribi, mester a tuma medidanan. Awor nos Pueblo di Aruba ta sinti con e medidanan ta pisa den nos cartera, unda cu nos poder di compra a bai atras y e nivel di bida di nos pueblo ta bayendo atras.

Atrobe mi ta sigiendo e reunionnan den Parlamento di Aruba tocante presupuesto 2016 di Pais Aruba, y scuchando con nos politiconan ta trata otro, mi ta bisa cu ta aki e rais di nos problemanan ta!!!
No tin respet pa otro su opinion, norma y balor a keda perdi. Tristo pa scucha y constata esaki, mirando gastonan di nos pais y criminalidad ta subiendo. Nos politiconan ta sigi hunga cu otro manera mucha chikito den Parlamento. For di e reunion di Parlamento aki riba menciona, por constata cu nos ministernan y parlamentarionan no tin respet pa otro, mi tin di bisa cu ekcepcion di sr. mr. Andin Bikker di PDR. Ta un berguensa pa mira y scucha con e personanan aki cu ta di nos organo mas halto di nos Pais ta trata otro. Unda cu no tin respet pa otro, ta insulta otro, ta trese constante mente mentira dilanti, cada biaha ta bai den pasado y atake personal riba otro pa no trese e berdad dilanti. Enbes di keda alcaso di e puntonan di agenda cu mester ser discuti. Tin minister cu ta nenga pa contesta preguntanan hasi door di oposicion of no ta contesta corectamente, minister no tin di lubida cu minister ta obliga pa contesta preguntanan hasi door di parlamento, e ta segun nos constitucion articulo III.17.

Tratamento di presupuesto ta un caso serio, mirando cu e tin consequencia pa nos tur y tambe pa nos yiunan y nan yiunan, ora cu tin mal maneho.
Remarcabel tambe ta cu enbes cu miembronan di Parlamento di AVP cu ta sostene  gobierno  ta questiona y hasi pregunta na e ministernan, nan ta sali splica y defende e minister. Parlamentario su tarea mester ta pa traha Lei y contola gobierno su ministernan pa tin bon gobernacion. No pa defende e ministernan, e ministernan mes mester por defende nan carteranan/ proyectonan. Cu otro palabra, no ta solamente oposicion mester controla y questiona nos gobierno pero, ful parlamento. Nos Parlamentarionan ta lubida cu ta representante di Pueblo nan ta y no representante di un partido politico mas, asina cu nan huramenta dilanti Gobernador nan a huramenta pa defende e bienestar (belangen) di Pueblo den su totalidad. Mi a ripara tambe cu cada biaha nan ta kita for di punto di agenda unda cu nan ta bolbe cai den e spiral negativo lubidando nan responsabilidad. E siman aki mi a ripara cu te asta e ministernan cu normalmente semper ta mas trankilo ta baiendo den e rumbo di e spiral negativo. Awor nan tambe ta tilda otro di ta Bullying (pest) otro y bo por ripara cu ta politico nan di partidonan tradicional ta baha di nivel.

Bullying ta algo hopi malo pa hasi. E ta un mal-trato,un  abuso, of agresividad purba pa ta dominante cu forsa riba otro. Ta conosi cu bo ta hanja bullying na scol y na trabou. Awor te asta den Parlamento di Aruba. Parlamento ta nos organo mas halto den nos pais, dus nos mester tin respet pa otro, unda cu nos Parlamentarionan y ministernan mester ta ehempel pa otro. Ta un berguensa y alabes un tristesa cu esunnan cu ta hasi uso di bullying ta nos ministernan y coalicion di AVP den parlamento. Nan ta tilda y tira culpa riba esunnan cu ta ser gebully cu ta oposicion. Mi conclucion ta cu e ta ser hasi pa no laga oposicion hasi nan trabou optimal y debidamente, unda cu oposicion no por hasi pregunta of risibi nan contesta alcaso. Ta purba cansa y saka oposicion for di balanse, unda cu gobierno ta keda sconde e berdad pa nos Pueblo di Aruba no hanja sa enrealidad kico a pasa of ta pasando. Tur e modus operandi aki of mihor bisa e manera di traha aki di gobierno y su coalicion tin consequencia negativo pa nos pais. Sumanan grandi di placa di pueblo di Aruba ta hungando un rol aki, dus pueblo di Aruba tin di bira conciente cu Aruba no por sigi den e rumbo aki mas.

Remarcabel tambe ta cu gobierno no ta bin cu un solucion y splica e pueblo con e ta bai paga e gastonan astronomico hasi aki bek. Minister President mr. Mike Eman tin e curashi y arogancia pa bisa cu e ta orguyoso pa a gasta e placa di Pueblo aki. Mi contesta na  minister president  ta: “cu orguyo e tin di para civiel y penalmente responsabel pa su mal maneho”. Pueblo di Aruba merese di hanja su placa bek den caha y tambe un splicacion con nan tin pensa di pagele.

Mi ta termina bisando, nos aki na Aruba mester hasi un cambio di mentalidad. Nos tin di bai bek na nos base, unda cu tin respet, norma y balornan halto cu nos a sinja for di nos mayornan y nos grandinan. Nos pueblo tin e alternativa, mester di hendenan serio, capasita, cu respet, norma y balornan halto. Analisa con nos lider sr. mr. Andin Bikker a hiba nos oposicion cu un asiento den Parlamento. Esaki ta prueba pa trese e balanse bek den nos hendenan. Ora cu un pais tin democracia, e ora tin respet pa nos pueblo, gobierno mester duna bon informacion. Nos di PDR ta defende interes di pueblo di Aruba.

Mi ta termina bisando:”como ciudadano conciente mi tin e responsabilidad pa hasi pregunta of duna mi remarke ora mi ta hanja cu pueblo no ta hanja informacion riba cual nan tin derecho di hanja.”

Atenta mente,

Ing. Alonso Tromp di PDR
Email: This email address is being protected from spambots. You need JavaScript enabled to view it.
Cell.: +297 5930011

Expresionnan haci den e articulo aki no necesariamente ta refleha opinion di ArenaPoliti.co