Gobernacion di un Pais ta algo serio y esnan cu ta wordo elgi pa goberna nos Pais mester refleha e seriedad aki tambe den e forma cu nan ta maneha nos Pais. Locual cu Minister Otmar a haci ultimo di bay Gobernador pa entrega su retiro pa dia 1 di maart 2016 bou di acusacion grave dirigi na su coleganan Minister y na direccion di Minster Eman pa despues di algun siman bin bisa cu tur cos ta bon y cu e no ta tuma su retiro mas, ta muestra cu e mandatario aki no ta serio. Minister Otmar a simplemente tuma Pueblo haci cu su carta di retiro na Gobernador.

No tin respet pa bienestar general
Minister Otmar a indica cu tin un crisis y cu e tin un preocupacion hopi grandi cu no ta hayando e oido debido di su coleganan y tampoco di su lider Minister Eman. E mandatario a referi aki na entro otro na e problemanan di criminalidad, maneho di su colega Minister Dowers di Husticia, decicionan financiero cu Minister Bermudez no ta tuma y na Minister Eman cu a faya den liderasco di e Pais aki. Segun Minister Otmar, Gabinete Eman no tin respet pa e bienestar general y esaki ta pone cu ela tuma e decicion di retira pasobra e no kier wordo reprocha despues di no a haci lo corecto.

No ta advertencia, sino un decicion
E Minister a indica cu su retiro no ta solamente un advertencia, sino un decicion tuma. Si no bin cambio elo tuma su retiro. Den e luna cu a pasa nos no a mira e cambionan cu Minister Otmar a referi na nan como tip di iceberg. E carta mes cu Minister Omar a entrega na Gobernador conteniendo e 9 puntonan di preocupacion nunca a ser entrega na Parlamento pa asina Pueblo haya sa con serio Minister Otmar su preocupacion ta te cu ela bay na e extremo pa hustifica su carta di retiro na Gobernador.

A tuma Pueblo haci
Remarcabel ta cu den e luna cu a pasa, maneho di Husticia, ni finanzas, ni e liderasco di Minister Eman no a mehora, pero diripiente Minister Otmar no ta tuma su retiro mas. Ta parce cu e bienestar general di e Pueblo diripiente no ta importante mas pa Minister Otmar y cu tur e show cu a wordo haci na Gobernador tabata djies pa por logra beneficio personal. Un Minister cu actua asina no ta sincero cu Pueblo y no ta serio. Cada dia ta bira mas bisto cu Minister Otmar a simplemente tuma Pueblo haci cu su carta di retiro na Gobernador.


29 februari 2016

Expresionnan haci den e articulo aki no necesariamente ta refleha opinion di ArenaPoliti.co