Aruba un bes mas den luz positivo riba plataforma internacional

ORANJESTAD/BRUSELAS-  Siman pasa Prome Minister Eman tabata na Bruselas unda el a tuma e encargo pa pais Aruba durante un aña largo ta presidi e asociacion prestigioso OCTA, bou di cual ta resorta e LGO-nan (Landen en Gebieden Overzee). Den pasado Aruba a yega di presidi OCTA caba, pero no cu un agenda ni tampoco un vision manera cu e tin awor. Presidencia di OCTA ta trece cu ne hopi bentaha pa Aruba, sigur si tene na cuenta cu Hulanda ta fungi pa un periodo dfi seis luna como Presidente di Union Europeo. Durante un conferencia di prensa den 'Europehouse' cu ta e lugar apropia pa haci e anuncio aki, Eman a amplia riba presidencia di OCTA.

"Desde cu nos tabata den oposicion y durante e añanan cu nos ta den gobernacion nos ta semper en busca pa crea un relacion cu Europa cu ta brinda nos mucho mas oportunidad cu e sistema di LGO cu su reglanan anticua. Eman a recorda con semper for di oposicion su partido tabata mustra cu e reglanan di LGO ya a expira y cu mester a trata na busca reglanan manera por ehempel UPG tabatin. "Reglanan cu ta duna mucho mas oportunidad di desaroyo y participacion den e metanan importante di progreso y prosperidad di Union Europeo. Of wak si por a haci cambio den e regimen di reglanan cu ta regarda LGO." Ta un hecho cu den transcurso di e ultimo añanan a logra cambia e pensamento pa loke ta e paisnan LGO door di pone hopi accento riba e balor strategico cu e areanan aki tin. Esaki den e mesun contexto a wordo haci den Reino Hulandes. "Nos ta mustra cu nos islanan por ta Centronan di Excelencia." Esaki no ta algo cu a sosode di un dia pa otro. A tuma gobierno hopi tempo pa por a convence instituto y empresanan di e potencial grandi cu Aruba tin. Aruba ta un gateway, un hub y un centro di excelencia pa institutonan Hulandes y Europeo. Cu satisfaccion gobierno di Aruba por mira con empresa y institutonan di Reino ta buscando nan caminda pa Aruba basa riba e vision aki. "Tur dia nan ta bira mas. Esun mas recien ta Port of Amsterdam", Eman a bisa cu orguyo. "Port of Amsterdam a caba di firma cu APA  pa bira parti di e trabounan cu nos ta haciendo den nos waf nobo di container, pero tambe di e desaroyo di nos waf na Playa. Cu esaki Port of Amsterdam ta haya oportunidadnan tambe den region."

Durante e periodo di un aña cu Aruba tin presidencia di OCTA cu banda di dje Hulanda tin e presidencia di Union Europeo di seis luna tin ta brinda gran oportunidad pa sincronisa e metanan y duna e LGO'nan un parti mas di e paketenan cu tin pa e areanan UPG cu LGO no tin. Eman a splica cu hunto cu su delegacion el a papia cu e comisario Europeo di cooperacion y desaroyo internacional sr. Neven Mimica kende a tuma bon nota di e deseo aki di e presidencia nobo di OCTA cu ta pa eleva e nivel di cooperaciopon pa hiba esaki na un nivel caminda ta mira  e balor agrega di tanto paisnan LGO como esnan di Union Europeo. "Nos a intercambia e pensamento aki tambe cu sr. Timmermans, comisario di Union Europeo. Timmermans, kende tabata Minister di Relacionnan di Exterior di Hulanda, a scucha cu hopi atencion." Tabatin varios otro encuentro unda Aruba ya a pone su deseonan bon cla dilanti. Un bes mas Aruba ta den luznan positivo riba plataforma internacional.

Expresionnan haci den e articulo aki no necesariamente ta refleha opinion di ArenaPoliti.co