Cedrick Tilma, representante di Aruba na Union Europeo    

ORANJESTAD – E siman cu a caba di pasa a tuma luga na Aruba un conferencia internacional, organisa pa Nacionnan Uni di sumo importancia pa paisnan afilia cu OCTA (Overseas Countries and Territories Association). E organizacion ta uni pais y islanan chikito cu ta afilia na Union Europeo. Presidencia di e organisacion internacional aki tabata responsabilidad di Aruba, representa pa Prome Minister Mike Eman. Na final di e conferencia, a pasa e responsabilidad pa Prome Minister di Turks & Caicos, Sharlene Cartwright Robinson.

Den e diferente encuentronan cu a tuma luga, a papia riba strategianan cu OCT-nan mester adopta pa aumenta nan perfil y bira partnernan valioso den Union Europeo.

Den e reunion di OCTA a keda presenta e programa cu Aruba a hinca den otro pa miembronan di e asociacion. Mirando cu 2020 lo mira e fin di e apoyo pa e partnership di UE-OCT, manera describi den e den e decision  di Conseho di Minister di UE. Cu e programa aki, Prome Minister Eman a bisa, e ta spera cu por cuminsa cu un consulta politico amplio entre miembronan di OCT y e cuatro Estadonan miembro cu nan e islanan ta conecta na nan, riba e balor agrega di un sociedad UE-OCT despues di 2020.

E consulta ta enfoca riba calidadnan cu a wordo cita como elementonan principal pa un “framework” exitoso: Mas fuerte; mas sabi, mas berde y cu mas participacion.

Un di e personanan clave den organisacion di e conferencia aki tabata Cedrick Tilma, kende ta representa Aruba na Brussels. “Nos por bisa cu e siman no tabata facil, pero nos a cera esaki cu un logro y exito grandi. Bou liderazgo di Prome Minister Mike Eman, Aruba a logra uni e grupo di LGO pa nan yega na un posicion comun riba con nan ta mira nan mes despues di 2020.” Tilma a sigui splica cu e islanan Ingles lo sali for di e Constelacion LGO na momento cu Inglatera no ta forma parti mas di Union Europeo. Esaki ta nifica cu e grupo di islanan cu tin un 'link' cu Europa, manera Aruba tin cu Hulanda, lo bira menos (mas o menos mita di e 25-nan cu tin actualmente).

For di momento cu Prome Minister Eman a tuma presidencia di OCTA aña pasa, e tabata consciente cu tabata bini cambio y e unico forma cu por atende cu esaki ta anticipando riba e situacion y yega na un posicion comun pa cu Europa. “No mester lubida cu Europa ta importante pa Aruba, nos tin paspoort Hulandes, cu alabes ta un paspoort Europeo, nos tin entrada na e mercado comun Europeo y por biaha libremente pa eynan. Nos ta ricibi basta recurso financiero for di Europa. Nos a haya financiamento di Europa pa e Parke Marino na Aruba, pero tambe e 'Green Faculty' di Universidad di Aruba ta haya financiamento. E ta un relacion importante pa mantene.” El a agrega cu e relacion ta haci tambe cu studiantenan di Aruba por sigui cu nan estudio rond Europa. Si e relacion no ta existi mas, Aruba lo no por disfruta di e beneficionan aki. Ta hustamente riba e beneficionan aki a pone hopi enfasis durante e conferencia. 

Expresionnan haci den e articulo aki no necesariamente ta refleha opinion di ArenaPoliti.co