Ta un bon momento pa analisa e desaroyo di San Nicolas bao di Gab Mike Eman (AVP)awor cu tin diferente desaroyo politico y ta worde spera mas ainda.

‘SAN NICOLAS PRIORIDAD NUMBER UNO ?’

Ocho anja pasa AVP a logra bin na mando cu e promesa na pueblo di San Nicolas cu San Nicolas lo tabata PRIORIDAD no. 1 si nan logra hanja e mandato pa goberna. Mientras tanto ta conoci cu pueblo di San Nicolas a duna nan e beneficio di duda durante dos eleccion.

Analisando e inversion di gobierno den San Nicolas y evalua e impacto economico di e inversion aki nos mester comprende cu esaki tabata masha poco mes y su ‘spin-of’ tabata sumamente poco. Mas cu por bisa ta cu durante e ocho anja aki ainda mas negoshi situa na San Nicolas y vecindario a sera nan porta, hasta mi por agrega cu e ultimo lunanan aki varios negoshi a sera porta pasobra cos ta asina malo cu nan no por a wanta pa mira si e impacto di e futuro ‘upgrader’ lo por a juda nan.

AVP NUNCA TABATATIN UN VISION PA SAN NICOLAS !

PPA a splica masha cla mes…..AVP nunca tabatatin un vision pa stimula desaroyo di San Nicolas. AVP a presta varios idea for di programa di PPA pero a ejecutanan ‘ad hoc’ y esaki simpelmente no ta stimula un desaroyo economico manera realmente ta worde desea.

Vision di PPA pa San Nicolas ta conoci pa kada kende cu ta lesa courant y ta lesa nos programa politico. PPA su programa pa San Nicolas ta publica den e documento ‘The AGENDA FOR SAN NICOLAS’ mientras nos vision ta carga e titulo ’San Nicolas, Our Caribbean Town’. Atrobe ocho anja ta pasa y San Nicolas no a ricibi e estimilo economico cu nos merece. Transformacion di e fascilidad conoci como refineria den un Upgrader NO ta bai ta algo nobo pa San Nicolas pero simpelmente un desaroyo riba tereno di e Upgrader cu San Nicolas a conoce pa anjas pero cual no tabata suficiente pa duna San Nicolas un empuhe nobo. Esaki cu tur respet pa e Upgrader cu indudablemente lo tin cierto impacto economico pero algo cu nos a conoce kaba y no ta algo nobo manera a worde priminti pa e.o. partido AVP.

WATERTOREN, NICOLAS STORE Y PINTA RIBA MURAY …IDEANAN DI PPA !

Algun projecto di PPA cu den pasado AVP a cuestiona pero durante e ultimo periodo nan e ejecuta ‘ad hoc’ cu esaki nos kiermen no den un vision pa asina realmente duna San Nicolas un empuje nobo.

Renovacion di nos Watertoren….rechasa y hasta nos a worde hari door di AVP den pasado a worde ejecuta ‘ad hoc’ y ta worde usa como un museum Industrial. Renovacion di edificio conoci como ‘Nicolaas Store’ cu PPA a boga anjas pa renova pero a worde boycotea pa varios signature iniciando cu AVP. Awe cu masha ‘tam tam’ a ejecuta e projecto aki como sifuera cu ta un idea di AVP. Anjas atras PPA a presenta e idea pa pinta riba muraya di e refineria y otro muraya na San Nicolas…y e idea di PPA tabata pa pinta pintura cu tin di haber cu e historia di San Nicolas y cu tin un laso directo cu San Nicolas. Lastimamente pa anjas largo otro idea di PPA cu a worde boycotea pa awor trece poco artista di exterior pa pinta diferente cuadra di cual varios no tin ningun ‘laso’ historico of social cu desaroyo di San Nicolas. E pinturanan ta bunita pero no ta tur tin un laso cu historia social cultural di San Nicolaas.


UNCLE LOUIS STORE……OTRO DEBACLE DI AVP CU LO BAI RIPITI SU MES !!

Pa colmo e edificio di Uncle Louis Store cu falta di vision di AVP a perjudica un desaroyo economico den pasado pa anjas…..awor atrobe e futuro cu AVP tin pa Uncle Louis Store lo bolbe perjudica futuro di San Nicolas. Kiko PPA kiermen cu esaki ? Den pasado AVP su gobierno a cumpra e edificio aki y a dunele na e Cuerpo di Adouana pa anjas !! PPA a splica e tempo ey cu San Nicolas tabatatin un restaurant di nivel e tempo ey net pariba di djele den e edificio ‘ex Acme Store’ y PPA a propone pa busca un grupo cu kier a exploita otro restaurant di nivel den e edificio aki pa asina cuminsa crea un ‘curazon economico’….un eventual restaurant den x all electric sales/Benito’s tambe lo por a contribui na un curazon economico aki pero lamentablemente Liderato di AVP/PM di Aruba no tabata comprende e materia y a pone un departamento di gobierno den e edificio cual NO a contribui ni un bledo na desaroyo di San Nicolas.

Kiko ta pasando awor? E edificio a worde bendi cu monumentenfonds cu e meta cu e lo worde renova despues di cual gobierno lo ‘huur’ e edificio aki pa e suma di f. 16.000,-- pa luna for di monumentenfonds pa e proximo cantidad di anja. Na prome lugar cu un suma di ‘huur’ halto asina ningun compania lo buscele pa ‘huur’ na San Nicolas pa exploita ningun restaurant of cualkier otro negoshi !! Na di dos lugar gobierno tin intencion di hinca departamento di Cultura den e Edificio aki…! Cu tur respet pa e departamento aki …..Ja PPA ta bolbe mira un cantidad di ambtenaar cu tur respet pa nan cu lo jega San Nicolas mainta y regresa Oranjestad etc atardi sin cu ta gasta mucho corda pa stimula un desaroyo economico nobo na San Nicolas. PPA ta ripiti un ‘Uncle Louis Restaurant’ di nivel lo juda stimula turismo y local pa bishita e area aki….no un edificio di Cultura y un vez mas ..cu tur respet !!

CARNIVAL VILLAGE COMBINA CARNIVAL MUSUEM:

PPA tabata e unico partido politico cu a presenta e idea pa construi un Carnival Village/Museum na San Nicolas pa presenta e historia di nos Carnaval den un museum. Atrobe PPA a worde hari pa justamente AVP. Pero ironia di bida tabata ora AVP no tabatatin su propio vision nan a tuma otro idea di PPA pa ejecuta…pero nan a ‘los e Carnival Village for di e Carnival Museum’ y pa colmo a ejecuta solamente un plaza nunca e Carnival Village NO a worde construi apesar cu e ta worde jama un Carnival Village anto construi riba e sitio mas contamina na San Nicolas cu posibel peliger pa tur cu ta usa e sitio aki.

Pa colmo gobierno di AVP lo a cumpra un edificio den San Nicolas pa construi e asina jama Carnival Museum….anto mientras e ministro di San Nicolas Mike de Meza cu a hanja e titulo di pueblo como THE MESS tabata ministro di Finanzas pa cuatro anja anto a gasta un 2 billion florin esta 2000 million den centro di Oranjestad anto apenas un 35 million florin den San Nicolas….consecuentemente pa ora el a hinca pais Aruba den un crisis financiero cu un debe gigantesco….no tabatatin placa mas pa a ejecuta e museum di Carnaval….y e situacion aki a keda te na e momento aki…!

PPA ta kere den e combinacion di un Carnival Village Carnival Museum pa razonan di factibilidad…futuro lo demonstra claramente kiko nos kiermen ora jega sina leeuw.

DIEZ BUSVERGUNNING PERMISO P PA STIMULA DESAROYO NA SAN NICOLAS …PERO RESULTADO MASHA POBER !!

Cierto momento a ejecuta otro idea di PPA esta pa duna ‘diez’ permiso di transportacion pa trece turista pa San Nicolas pero no a duna resultado. Esaki ta di comprende …si bo parti e permisonan aki pero bo no a drecha cierto sitio cu por bira sitio turistico na San Nicolas y vecindario anto di mes …. Lo tin masha poco sitio pa e chauffeurnan aki hiba e turistanan y esey mes a tuma y ta tumando lugar cu e iniciativa aki.

PPA su vision/idea ta ensera cu gobierno mester para ‘garantia’ pa diez chauffeur cumpra busnan estilo ‘streettrolley’ cual lo duna tour solamente pariba di brug y lo mester cumpli cu un bishita na varios sitio den San Nicolas cu por worde prepara pa e bishita di turista. Impression cu e bus estilo ‘streettrolley’ lo causa lo crea un imagen especial den centro di San Nicolas.

PPA ta cuestiona …con bin AVP a tuma e idea di PPA pa un ‘streettrolley’ na Oranjestad over y a ejecutele pero e idea pa sosten ‘diez’ chauffeur cu garantia pa ‘streettrolley’ riba wiel NO a worde teni cuenta cunele.

Conclussion ja cu excepcion di un eventual transformacion di e fascilidad den un Upgrader y ponemento di poco ‘klinkers’ y renovacion di algun scol…..San Nicolas No a ricibi un empuje di AVP pa crea un desaroyo economico nobo. Pesey hopi ciudadano ta tristo pero silencioso. PPA lo bin bek riba e materia aki.


Aruba, 2 februari 2017
Lider Politico di PPA
BENNY NISBET

Expresionnan haci den e articulo aki no necesariamente ta refleha opinion di ArenaPoliti.co