AIB a entrega rapport “San Nicolas, Second Tourism Capital of Aruba”. 

Diahuebs Ministernan Otmar Oduber y Mike de Meza a ricibi e rapport di Aruba Investment Bank (AIB) relaciona cu e estudio cu nan a haci pa haci di San Nicolas e di dos capital turistico di Aruba.
AIB a repasa hunto Minister Oduber y Minister de Meza e estudio aki y a discuti e ultimo punto nan cu falta pa asina presenta e rapport final: “San Nicolas, Second Tourism Capital of Aruba –Cultural Heritage Capital of Aruba”.

Den e rapport ta inclui e recomendacionnan cu a bin dilanti for di conversacionnan cu nan tabatin cu diferente stakeholders, entre nan ATA, AHATA, asociacion di banconan, Separtamento di Cultura, Stichting Monumenten Fonds, Museonan, Infra Team, San Nicolas Bar Association y San Nicolas Business Association. 

Durante e reunion AIB a ricibi feedback di e Ministernan pa asina finaliza y entrega e rapport final cu lo inclui e plan di accion, timeplanning, opcionnan financiero y oportunidadnan pa inversion na San Nicolas pa asina presenta e plan final pa fin di februari.

Manera papia anteriormente e businessplan aki lo pas den e cuadro completo pa San Nicolas  unda cu e parti di e herencia Cultural di Aruba y San Nicolas lo ta e motor pa asina cuminsa revitaliza San Nicolas. Di e manera aki tambe forma parti di lo cual Gobierno ta haciendo algun aña caba, unda a percura pa drecha infrastructura di entre otro Joe Laveist y Carnival Village. Minister Oduber a indica cu banda di e proyectonan aki, e aña aki lo cuminsa cu e proyecto di museonan cu lo ta ubica den Watertoren y pronto den Nicolas Store restaura.

E mandatario a indica cu loke ta wordo prepara y presenta como e vision di e di dos capital turistico, e factornan cultural cu mester ta mara na dje ta e base pa loke ta e desaroyo cu ta bay bin ta mara na dje.

E ta bisa esaki pasobra tempo cu tabatin un refineria, e refineria tabata defini kico e resto di desaroyo tabata. Awor e ta net lo contrario “nos mester pone e base y a base di e base aki hunto cu colega Sevinger, Prome Minister y Conseho di Minister fiha pa futuro kico nos kier haci cu e area di Valero. Na e momentonan aki ya caba ta papia riba diferente opcionnan, pero e masterplan cu ta bay wordo traha pa e area aki mester tin continuidad di loke nos ta creando na e momentonan aki na e curazon di San Nicolas, esta pa haci di San Nicolas e di dos capital turistico di Aruba y e centro di nos herencia cultural”, Minister Otmar Oduber a finaliza bisando.

Expresionnan haci den e articulo aki no necesariamente ta refleha opinion di ArenaPoliti.co