E titulo di e articulo aki, ta un pregunta cu hopi hende ta haci nan mes, pero ta poco ta tribi haci’e publico. Algun motibo pa esaki, ta cu hopi hende tin miedo di e clase politico, algun ta prefera biba den un mundo di fantasia, mientras otro a conforma nan mes cu e idea cu nada lo cambia mas. Pa es motibonan aki, e politiconan tradicional ta sigui abusa manera semper nan a haci.

Pero si bo analisa e contestanan riba e pregunta aki cu bo ta tende den seno laboral, familiar of di amigo, anto bo lo ripara cu semper e contestanan ta dirigi na e cantidad di extranjero (legal of ilegal) cu tin riba e isla. Un observacion corecto, pero no completo. Pasobra e pregunta tin hinca den dje e meta pa establece pertenencia y/o balor di algo. Husto e parti aki, ta esencial pa comprende miho e gravedad di e situacion socioeconomico actual di Aruba.

Un banco ta fia un persona placa si e ta integro, si e tin un entrada fiho y si e suma ta grandi, si e tin ‘assets’ (borg). Den e caso di un pais, esakinan ta su ‘rating’ financiero, locual e ta genera na entrada, y locual e tin como propiedad y recursonan. Awor den e caso particular di Aruba, Aruba tin un debe astronomico. Si e no tabata pa e echo cu Aruba ta forma parti di e Reino Hulandes, cu den e caso extremo Hulanda tin cu paga e debenan di Aruba, Aruba su ‘rating’ financiero lo tabata hopi mas abou. E parti mas grandi di e entradanan di gobierno, ta bay pa paga salario y interes di e debe biyonario. Y di e ‘assets’, casi nada a resta.

Ultimo añanan, poco poco tur ‘assets’ di Aruba a wordo bendi of hipoteca. Antes gobierno tabatin su propio edificionan. Awendia gobierno ta huur casi tur su edificionan pa sumanan hopi halto y pa hopi añanan largo. Nos empresanan estatal awendia ta vulnerabel pa via e cantidad di debe cu nan mester a acumula pa duna gobierno placa. Nos puertonan strategico (aeropuerto y haf) a wordo ‘concesiona’ pa minimal 25 aña na algun entidad priva. Nos hospital biyonario, lo ta kisas atrobe di pueblo aki 25-30 aña. E par di molina di biento, cu mester a baha e prijs di coriente, tambe lo por bira propiedad di WEB aki 20 aña. Y pa complementa e lista, awendia hasta e careteranan, pueblo tin cu warda 25 aña prome nan bira propiedad atrobe di pueblo (un ehempel ta e ‘Caminda Scur’ di 750 miyon florin sin ‘betonband’). Pues pueblo no ta doño mas di algo. Pero asina mes, cada dia gobierno ta haya un otro forma creativo con pa hipoteca mas ‘assets’ di pueblo pa despues bende pueblo esaki manera algo bon of ‘historico’. Si pueblo realisa su mes cu en realidad nada mas ta den man di pueblo ora di haci su mes e pregunta ‘Ainda Aruba ta di nos?’, anto e ora ey e lo realisa ki impacto grandi y desastroso e forma di goberna durante añanan tabatin pa e isla, su futuro generacionnan y su orguyo. E unico cos cu pueblo ainda ta doño di dje, ta e debe causa pa e clase politico na proyectonan dudoso.

Pues refleha y puntra bo mes si e desaroyo aki ta uno husto y na bienestar di e isla y su futuro generacionnan. Si ainda bo persona lo kier para un banda y pensa cu nada lo cambia, mientrastanto cu cada dia bo tin menos di bisa riba e isla aki. Si ainda bo persona ta prefera di critica y demotiva tur hende cu si kier para e desaroyo negativo aki, enbes di sostene nan. Bo persona no ta kere cu e la bira tempo pa para e bendemento di tur patrimonio di pueblo, pa algun ‘makelaar’? Danki di antemano pa bo atencion y sosten!

(www.aboaruba.org , info@aboaruba,org )

Expresionnan haci den e articulo aki no necesariamente ta refleha opinion di ArenaPoliti.co