Minister Mike de Meza: Nos ta sigui traha pa hiba San Nicolas y henter Aruba na e siguiente nivel di bienestar socio economico
ORANJESTAD – Diahuebs mainta e yiu ilustre di San Nicolas a haci un bishita hunto cu Prome Minister Mike Eman den caya principal di San Nicolas, como tambe Village. Mirando tur e proyectonan concreta y esnan actualmente den ehecucion, e mandatarionan semper ta busca pa tin un contacto directo cu e ciudadano y asina haya feedback riba nan maneho. “Bo ta mira hendenan ta hopi contento ora nan mira nos. Nan ta bisa bo cu esaki ta un Gobierno cu en berdad ta sinti cu a duna atencion na San Nicolas,” asina Minister de Meza a comparti.
For di Promenade den B. van der Veen Zeppenfeldstraat caba tabatin trahadornan laborando duro riba loke ta e embeyecemento di e caya aki. Ministernan a pasa cuminda y gradici nan pa e dedicacion pone na mehoracion di e ciudad. Siguientemente a cana bay pariba cuminda tur esnan den cada oficina, cada negoshi y tambe wardando bus na stacion. E delegacion tabata compaña pa entre otro President di SNBA (San Nicolas Business Association), personal di GKMB (Gele Koorts en Muskieten Bestrijding), Bo Bario y otro agencianan gubernamental.
Minister de Meza a bisa cu for di entrada den Gobierno na 2009, Gabinete Mike Eman I su enfasis tabata pa drecha infrastructura di San Nicolas. Prome Minister Eman a pusha su ekipo pa yega na cas di tur esnan cu ta biba na San Nicolas, specialmente esnan di menos entrada.
Inmediatamente trabou a cuminsa na De Vuyst, den Village, Mabon, etc. a drecha e infrastructura renobando cayanan manera Pastoor Hendrikstraat y poniendo drempel pa trafico. Tambe a construi, renoba y amplia facilidadnan deportivo manera Joe Laveist Sport Park y parkenan manera Lago Heights y e Xander Bogaerts Lago Heights Sport Park. Otro ehempel ta 'Carnival Village' mes.
E Minister di Asuntonan Economico, Energia y Medio Ambiente a splica cu scolnan manera St. Augustinus College y Abraham de Veer School cu pa añanan no a haya mantencion, awendia ta manera dos scol completamente nobo pasobra nan a cambia totalmente y a keda masha bunita mes. “Esaki ta trabounan cu a wordo haci te hasta ora cu refineria no tabata den operacion,” Minister de Meza ta pensa.
Ocho aña despues hopi a wordo haci y no a caba ainda. Pronto e di dos fase di renobacion di Village ta bay cuminsa caminda ta bay construi un cura pa e casnan di FCCA. Minister Mike de Meza a bisa cu “Ta diferente proyecto den un plan total. Na prome hopi hende no por a compronde, pero awor si ta mir’e. Ta proyectonan grandi cu normalmente ta tuma luga cada 30 pa 50 aña; nos a haci tur den dos gobernacion Gabinete Mike Eman I y II pa e pais aki por bay na e siguiente nivel di bienestar socioeconomico.”
Expresionnan haci den e articulo aki no necesariamente ta refleha opinion di ArenaPoliti.co