"E siman aki na Havana, Cuba, gobiernonan di Aruba y Cuba lo firma un acuerdo di cooperacion cu enfoke ariba turismo", asina e minister encarga cu Turismo a duna di conoce na su salida dialuna ultimo. Desde mas of menos un aña pasa a cuminsa cu tramitenan entre departamentonan di asuntonan exterior di ambos Pais, despues di un bishita oficial di Minister Otmar Oduber y un delegacion consistiendo di entre otro e directora di ATA, Sra. Ronella Tjin Asjoe -Croes, Director di departamento di Asuntonan di Exterior, Sr. Edwin Abath y conseheronan di e minister. Durante e bishita aki a combersa cu e mandatario encarga cu Transporte, Sr. Cesar Ignacio Arocha Macid, riba e posibilidadnan pa crea un ruta di barconan crucero specificamente entre e dos Paisnan aki hunto cu otronan den e region mas seit di Caribe. Combersacionnan cu e titular di Turismo a continua tambe algun luna atras cu su coleganan di Panama y Corsou.
Otro topiconan sigur di interes y cu lo traha riba nan atravez di plataformanan di trabao entre e dos Paisnan ta e asina yama "Dual Destination Program" y fortificacion di conocemento y informacion ariba areanan di maneho di facilidadnan crucero y strategianan di mercadeo pa atrae e bishitantenan. Sigur tin un interes di parti di Cuba pa intercambia di conocemento cu Aruba specialmente riba e ultimo dos topiconan menciona mirando e "success story" cu Aruba tin ariba e tereno di maneho di strategianan y facilidadnan crucero. E experiencia ariba e tereno di Timeshare y conceptonan di ley nobo pa regula All Inclusive sigur tambe lo wordo discuti. Banda di e topiconan di turismo y transporte, topiconan di agricultura y cultura sigur tambe lo ta halto ariba e agenda di Minister Oduber durante su bishita na Havana. Diaranson lo tuma luga e acto oficial di firmamento di e documento importante aki entre e Minister encarga cu comercio y inversion exterior, Sr. Rodrigo Malmierca Díaz y Minister Otmar Oduber, encarga cu Turismo , Transporte, Cultura y Sector Primario
"Aruba ta mira Cuba manera un destinacion nobo, apesar di ta existi pa basta tempo caba. Pronto lo conoce cambionan organisatorio cu lo percura pa haci di Cuba un destinacion mas atractivo pa explora for di e mercado Mericano y e convenio aki ta pa nos por ta alinea cu posibilidadnan nobo cu esaki lo por brinda pa Aruba", asina Minister Oduber a duna di conoce.

Expresionnan haci den e articulo aki no necesariamente ta refleha opinion di ArenaPoliti.co