Parlamentario mr. Juan Ady Thijsen a tuma nota cu despues di un proceso largo na final di esaki un acuerdo a ser logra cu e compania Citgo pa un reapertura di nos refineria. E noticia aki ta worde ricibi na grandi pa e pueblo di Aruba ya cu ta e reapertura di e refineria ta e unico salbacion di Aruba su economia a termino cortico y mediano plazo segun tur expertonan y instancianan financiero economico tanto na Aruba y internacional. Parlamentario mr. Juan Ady Thijsen a tuma nota tambe cu e noticia di reapertura di e refineria no cai bon cerca Prome Ministro y lider di AVP Mike Eman. Segun Parlamentario mr. Juan Ady Thijsen Mike Eman no a mustra e alegria cu sa tin ora di firma MUO-nan o acuerdonan den exterior. Esaki ta logico pasobra gobierno di Aruba na varios ocacion a confirma cu e ta bai pa desmantelacion. Hasta den presupuestonan ta pone cu un fundacion nobo di FDA lo maneha e terenonan cu lo a bin liber y no lubida cu Mike Eman a hiba un campanja den extrerior como Il salvatore green y awor Aruba mes ta back den industria chemico petrolero. Segun Parlamentario mr. Juan Ady Thijsen no mester lubida tambe con AVP a chercha bisando bai San Antonio Texas. Parlamentario mr. Juan Ady Thijsen ta contento cu hopi a lanta para contra desmantelacion manera mr. Evelyn Wever Croes lider di MEP cu a guia MEP cu e dicho di libertador Betico Croes si tin un porciento di posibilidad pa habri e refineria nos lo sigi cu intentonan. Colega Parlamentario y ruman Genbert Croes a haci un tremendo trabao cu su contactonan na Venezuela pa hiba e proceso di reapertura na un final exitoso. Como presidente di commission di accion Ora Cera Parlamentario mr. Juan Ady Thijsen ta gradici tur cu a participa y apoya e actividad historico dilanti porta di Valero. Tambe Parlamentario mr. Juan Ady Thijsen ta gradici otronan manera e grupo PARA y tur cu a contribui pa para desmantelacion y yega na un acuerdo di reapertura entrenan e commission di gobierno. Segun Parlamentario mr. Juan Ady Thijsen awor ta drenta e etapa di formalisacion y aprobacion di acuerdonan pa reapertura y Parlamentario mr. Juan Ady Thijsen ta spera cu cada parlamentario sali na interes di nos pais. 

Expresionnan haci den e articulo aki no necesariamente ta refleha opinion di ArenaPoliti.co