Tanto na december 2015 como na mei ultimo, partido UPP a urgi na nos Parlamento pa exigi for di gobierno pa trata un posibel reapertura di e refineria den un forma transparente, particularmente pa loke ta trata e acuerdo.
Mescos cu na december 2015 y na mei ultimo, nos politiconan, particularmente esnan den gobierno y tambe den Parlamento, ta debati riba ken a haci e maximo esfuerso y ken ta esun cu a logra e reapertura di e refineria.
UPP a indica caba na 2015 cu nos no tin problema na duna reconocimento na tur esnan cu a haci nan empeño pa e posibel logro aki, pero cu ta na su lugar pa primeramente wak cu e deal cu ta wordo sera cu Valero, esun cu CITGO/PDVSA y cu Gobierno Venezolano, ta uno cu realmente ta cumbini Aruba.

Den henter e proceso aki nos por ripara un menosprecio grandi pa nos Parlamento.
Nos por a scucha na mei ultimo con ora a puntra ministro de Meza, dicon na Venezuela e acuerdo mester bay asamblea prome y na Aruba e ta bay Parlamento, e ta bisa cu ta trata di proceduranan interno di un pais cu cada ken mester respeta.
Na Aruba nan (pues gobierno) a scohe pa haci tur e dealnan prome y despues ora cu e acuerdonan wordo firma, nan ta bay Parlamento. Pues “mosterd na de maaltijd”.

UPP ta sumamente preocupa pa loke ta e contenido di e acuerdo.
Mientras cu nos ta tende miembro di oposicion sr. Glenbert Croes ta pidi gobierno pa manda e acuerdo pa trate y pase pa caba, nos pregunta ta na oposicion di Aruba, si nan mira cu e acuerdo no ta cumbini Aruba, nan lo vota toch pa esaki? Por ehempel cu si Aruba lo ta responsabel pa desmantelacion despues y hacimento limpi di e tereno contamina??

Durante di e presentacion di Presidente Venezolano, nos di UPP ta tene na cuenta tambe e aspecto geo-politico cu Nicolas Maduro a hinca den henter e desaroyo repentino aki di algun dia despues cu a topa cu minister presidente Mike Eman na Cuba.
Aki ta bin e fantasma di “Petro Caribe”, cu hustamente e gobierno anterior juist no kier a mara Aruba na dje, manera cu hopi paisnan den region ta mara na man cu pia.

Tambe UPP kier sa awor e opinion di gobierno y di partido AVP riba e hecho cu awor sí ta bon pa bin cu un liña di gas for di Venezuela, mientras den pasado a haci hilaridad riba uno for di Colombia, mescos tambe esun di e “kabel hydro-electrico”.
E tempo ey e ponencia di AVP tabata cu nos como pais ta entrega nos autonomia den man di paisnan vecino.
Cu e paso aki awor tambe AVP lo por biba cu un kabel asina!
UPP mescos cu den tempo di eleccion tabata di opinion cu un tipo di dependencia asina no ta deseabel, esaki tambe ta conta pa loke ta e “gas-o-ducto”. Na momento di un posibel controversia, por stop tambe e entrega di “gas”, mescos cu esun di “coriente”.

Un otro aspecto cu a hala nos atencion ta na momento cu e ministro di Petroleos y Minas di Venezuela Eulogio del Pino a bisa cu e prijs di petroleo ta haci cu ta mas factibel awor pa bay saca e petroleo for di Faha di Petrolio di Orinoco y manda pa Aruba pa kibra esaki.
Nos pregunta ta, kico ta pasa na momento cu e prijs bolbe subi, manera ministro Mike de Meza a bisa na 2010 den Parlamento cu esaki lo por hasta yega 500 dollar?
Pues, apesar cu lo tin un combenio awor aki di 25 aña, kico lo pasa?
Pa razonnan economico por dicidi di sera e refineria bek; kico ta e combenionan cu a logra cu CITGO/PDVSA? Of ta algo cu lo bolbe bay wak e tempo ey?

Mientras cu tur atencion ta concentra riba e acuerdo cu tin awor aki cu CITGO/PDVSA, kico ta e otro acuerdonan cu tin cu por ehempel Valero?
Kico Aruba mester a entrega pa por a haya e facilidadnan bek?
Banda di laga e claim cay, tin compensacionnan cu Aruba tin di haci ainda na Valero, particularmente despues cu nan mester a entrega e facilidadnan di transhipment?
Unda e acuerdo di e pasamento di tur propiedad di Valero pa pais Aruba ta? Kiko ta e condicionnan?
Unda e acuerdo ta pa importacion, y cu ken pa e "light/sweet crude oil" cu mester wordo usa pa mescla cu e "heavy sour crude" di e belt di Orinoco pa por saca esaki y pa sigui procesa esaki?

Preguntanan cu mester wordo contesta dor di haci e acuerdonan aki publico. Sin esaki nan ta “in place” keto bay, y UPP no ta mira cu tin motibo pa ta di hubilo, tanto dor di partido di gobierno, como esunnan di oposicion.
UPP lo keda monitor e desaroyonan y lo laga su voz resona.


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, juni 14, 2016

Expresionnan haci den e articulo aki no necesariamente ta refleha opinion di ArenaPoliti.co