Awor cu nos a logra pa sigura pa habri e refineria di Aruba, nos mision awor ta pa sigura pa tur yiunan di tera y contratistanan local haya trabao den e refineria.

Diabierna nos digno pueblo tabata testigo di e echo con nos fe y determinacion den e 1% cu nos Libertador a laga como mensahe atras pa nos, esta cu si tin 1% chance pa habri e refineria nos mester lucha te ora logr’e, con e 1% ey a bira 100%.

E ta un gran victoria pa nos digno pueblo cu si a keda kere cu e refineria por habri ora cu e propio gobierno di AVP a give up y hasta a purba mata e speransa di nos pueblo pa purba convence pueblo cu no tin nada mas pa haci, nos digno pueblo no a perde speransa nunca.

Ora cu partido AVP su gobierno y fraccion den Parlamento tabata  rechasa e mocionnan cu nos a presenta na diferente ocasion, ora cu AVP tabata chercha di e esfuerso di mocion si acepta, partido MEP a dicidi di convoca un reunion extraordinario cu a desemboca den e “Accion Ora Cero” unda MEP y nos pueblo schouder cu schouder a bay porta di Valero e dia anochi ey pa manda e mensahe pa AVP y Valero cu nos digno pueblo bao niun circumstancia lo laga ni AVP ni Valero desmantela y destrui e refineria.

E acuerdo awe firma ta contene e proposicion di principio di partido MEP: 1. pa saca Valero afo, 2. pa pueblo bira doño di e refineria, 3. pa lease huur e refineria cu PDVSA usando modelo Corsou, 4. pa no cumpra e refineria sino inverti den e refineria,  5. brasa e proposicion di PDVSA pa un gasducto Venezuela Aruba.

Ta e curashi, vision y proposicion di MEP a prevalece pa awe danki na nos gran Dios, Aruba a ricibi otro milagro cu e reapertura di e refineria.

Awor pa sigura cu tur yiu di tera y contratista local haya trabao den e refineria, partido MEP ta bin cu un CITGO desk den tur bario pa sigura e meta aki.

E ta e gran victoria di un gran pueblo cu a pone Gabinete Mike Eman 2 baha cabez pa e rosea cayente di nos pueblo cu semper a keda cu e speransa cu por habri e refineria bek. Diabierna ultimo e speransa di nos digno pueblo a bira realidad.

Expresionnan haci den e articulo aki no necesariamente ta refleha opinion di ArenaPoliti.co