Encuentro na San Nicolas riba contracto cu CITGO 

ORANJESTAD – Minister di Labor drs. Paul Croes a keda hopi satisfecho di un serie di reunion caminda cu, hunto cu su coleganan Prome Minister Mike Eman y Minister Mike de Meza, a informa gremionan di e detayenan rond di e contracto firma entre Pais Aruba y Citgo Petroleum Corporation. Minister Croes a splica cu e ta hopi satisfecho principalmente debi na e entusiasmo grandi cu gremionan tabata tin den tur e encuentronan aki.

For di den oranan di mainta, Diahuebs ultimo, e ministernan, hunto cu integrantenan di e team negociado, tabata na San Nicolas unda cu tabatin encuentro cu gremionan comercial, sindical, contratistanan y finalmente tambe habitantenan di San Nicolas. “E entusiasmo tabata enorme. For di e contratistanan te na e gremio comercial a keda impresiona cu logro di e acuerdo aki cu tabata uno hopi bon prepara,” Minister di Labor a bisa na final di anochi.

Pa medio di e encuentronan aki, e mandatarionan kier percura cu mas tanto persona, principalmente stakeholdernan, ta na altura di detayenan di e contracto cu CITGO cual lo bay ta masha importante pa economia di Aruba.

E logronan den e acuerdo aki ta riba tereno fiscal, legal y laboral. Pesey den tur e encuentronan a purba splica mas miho posibel e importancia di reapertura di e refineria aki, su impacto economico cu ta 15%  riba den economia, e impacto laboral cu ta nifica un reduccion di 3 pa 4% di e desempleo, y e impacto comercial rond di e refineria. Gobierno, el a bisa, ta contento cu e entusiasmo cu a wordo sinti bou di e gremionan comercial, sindicato, y contratistanan pasobra “nan ta esnan responsabel pa informa nan miembronan riba kico e desaroyo aki lo nifica pa nan sector. E reunionnan a bay den ambiente formidabel.”

Como mandatario encarga cu Asuntonan di Labor, Minister Croes a bisa cu el a percura pa den e reunionnan aki duna un splicacion detaya di kico ta bay ta e regimen laboral cu CITGO Petroleum Corporation, lo tin na momento di e reapertura, e cantidad di trabou pa Arubiano cu lo bay tin, unda cu e hendenan por bay pa solicita, esta e CITGO Desk. E instancia aki ta algo cu a keda acorda cu e compania operador di e refineria pa wordo estableci y cu lo brinda ayudo na tur ex empleadonan di e refineria cu kier solicita. E mandatario a agrega cu e instancia aki ta consisti di personal di Depto di Labor, di Ministerio di Energia, y personanan cu conocemento tecnico den materia i e refineria. “E ta mustra e seriedad con Gobierno a bin ta hibando e negociacionnan di cual Hulanda na tur momento tabata na altura di e detayenan.”

Minister Croes mes a keda hopi satisfecho con Gobierno a presenta e informacion. “E tabata un presentacion completo riba e “Business Model” aki, e impacto local.”

E contractnan firma cu Citgo Petroleum Corportion pa rehabilita y opera e refineria aki, procesando e crudo pisa di Venezuela, ta bay tin un impacto grandi riba economia di Aruba. Esaki pa e cantidad di cuponan di trabou nobo, cu un miho nivel di salario, pero tambe tur e beneficionan cu e reapertura lo tin pa e negoshinan den bisindario di e refineria. Gabinete Mike Eman II durante mas cu un aña a bin ta trahando intensivamente pa realisa e logro aki. 

Expresionnan haci den e articulo aki no necesariamente ta refleha opinion di ArenaPoliti.co