E discusion riba e regulacion di All Inclusive a sali for di man completamente. Un gobierno cu semper a para pa dialogo awe ta bai linja recta contra dialogo y mas bien kier dicta den cua direccion mester bai. Otmar Oduber a dicta riba e beach policy, a dicta riba permiso di hotelnan y awor ta dicta riba permiso di taxi tambe. Nos tur ta consiente cu e regulacion di All Inclusive mester bin pa frena e fenomeno aki y nos pais no wordo converti den un destinacion caminda mayoria accomodacion ta All Inclusive. Nos a bisa esaki den pasado y nos ta para mesun caminda, Aruba no ta un destinacion All Inclusive. Loke si nos ta lamenta ta e wega peligroso cu Otmar Oduber ta hunga. Di un banda e ta bisa cu hotelnan All Inclusive ta malo y mester regula esaki y di otro banda e mes kier sigui yena nos pais cu hotelnan All Inclusive. Awor aki 32% di nos inventario ta consisti di hotelnan All Inclusive y Otmar kier aumenta esaki ten a 40%. Cu esaki e minister ta demostra claramente cu envez di frena all inclusive e kier mas all inclusive. Pregunta cu sigur  e Minister mester constesta ta cu si 2 hotelnan grandi riba e strip cual ta Holiday Inn y Hilton (cu a kaba di wordo cumpra recien) aki ta den e 8% aki. 

AHATA ta e partner di mas importante di gobierno pa loke ta trata e maneho di turismo. Envez cu purba yega na un consensus Otmar Oduber ta ACUSA AHATA di ta ganja y malinforma gremionan. Expresando su mes asina aki e ta falta respet pa tur miembro di AHATA y ta yama tur pa ganjador. Mester corda cu den e board actual di ATA tin miembronan di AHATA tambe aden.

AHATA a presenta un carta diabierna ultimo na minister Oduber den cual mayoria di e hotelnan a bisa cu nan NO lo bende nan hotel cu un cadena di hotel all inclusive den e proximo 12 lunanan. AHATA ta pidi Otmar Oduber un cooling off period pa haci un bon investigacion, cual na e momentonan aki no tin y  pa despues sinta papia con pa regula All Inclusive. E carta a wordo firma pa AHATA, Camara di Comercio y ATIA. Un di e motibonan pakiko Otmar Oduber tin hopi pura pa trata e ley pa regula inclusive ta pasobra segun e tin 2 hotel riba e high rise strip cu tin hopi interes pa mas liher posibel bira  uno All inclusive. Pa e motibo aki Otmar Oduber su interes pa trata e ley aki awor pa asina evita cu posiblemente e hotelnan aki por bira all inclusive.

Remarcabel ta e hecho cu den e carta di AHATA net e 2 hotelnan cu segun Otmar Oduber ta papia cu tin interes pa nan wordo converti den hotelnan All Inclusive NO a FIRMA e carta cu nan NO lo wordo bendi. Awor e pregunta cardinal ta,pa kiko nan no a firma e carta hunto cu e resto di miembro nan di AHATA?  Mas stranjo aun ta e hecho cu den e ley Otmar mes ta duna espacio pa bin cu mas hotelnan All Inclusive y e ley mes ta permiti pa hotelnan manera Hilton y Holiday Inn bira ALL Inclusive mirando cu ta duna espacio pa 8% di camber nan di hotel bira All Incl. Kiko Otmar su intencion ta pa cu e ley aki anto? E kier regula y frena all inclusive di un banda pero di otro banda ta duna espacio pa 8% bira All Inclusive!!!

Expresionnan haci den e articulo aki no necesariamente ta refleha opinion di ArenaPoliti.co