Cu e refineria e metanan di sostenebilidad y reparticion mas husto ta haya mas forsa. 

"Sin e refineria y mey mey di tres crisis, nos a logra saca nos economia for di e pio caida den historia y den mundo. Bou di e pio condicionnan economico y financiero a logra crea mas cupo di trabou, sanea e fondonan di pensioen y di seguro medico. A logra reduci e deficit riba presupuesto y yega na e punto di un presupuesto publico balansa. A logra tene y mehora forsa di compra mi miles di trahado, pensionado y nan famia. A cuminsa cu un reparticion mas husto di entrada den nos comunidad usando fondonan publico. Awor cu e refineria lo bay habri - si un majoria den parlamento aproba esaki - e entradanan adicional lo por wordo usa pa sigui cu e maneho di sostenebilidad riba tur tereno, fortifica finansa publico y sigui crea un comunidad mas husto pa tur. Specialmente esnan mas vulnerabel den nos comunidad." Asina Rene Herde' di partido AVP a declara den un reunion den bario di Paradera diabierna anochi. Cu e declaracion hopi cla aki Rene Herde' ta accentua continuacion di e metanan cu partido AVP a fiha for di comienso di gobernacion di AVP na 2009. Esta cu e recuperacion economico y financiero, creasion di mas cupo di trabou, haci nos pais mas resistente y menos dependiente, mantencion y mehoracion di forsa di compra y un pais mas husto, incluyende un reparticion mas husto di entradanan, ta keda metanan central di gobernacion den futuro tambe.

AMPLIASION DI PROGRAMA
Ora a puntra Rene Herde si no mester amplia e metanan di e programa di gobernacion, su contesta tabata esaki: "Semper lo tin ampliasion y renobacion di bo programa di gobernacion. Aunke awor aki ta mucho tempran pa papia di esey. Pero e metanan cu nos a fiha tabata asina grandi y asina amplio, cu nos mes a bisa biaha pasa cu "ainda falta". Nos a logra realisa hopi di e temanan grandi y crusial pa nos comunidad. Manera saca nos pais di e pio crisis economico y financiero den nos historia, sigura entrada di miles di hende y pensionado, crea mas cupo di trabou y awor habri e refineria. Tog tin mas pa haci. Specialmente den mehora entrada pa tur hende y evita cu hende cay den necesidad financiero grandi. Anto specialmente esnan cu entrada mas abou. Di berdad ainda falta, aunke nos a yega hopi leu y bou di e pio condicionnan posibel."

Expresionnan haci den e articulo aki no necesariamente ta refleha opinion di ArenaPoliti.co