Cu e leynan di all inclusive y e reapertura di nos refineria, gobierno ta sigui falta respet na nos Parlamento, segun palabranan di Andin Bikker durante e rueda di prensa semanal e siman aki. Esaki pasobra ta den prensa tin cu lesa informacion mientras cu gobierno no ta entrega documentacion na miembronan di Staten. 

Tocante all inclusive a pasa un mocion den cual ta specifica cu mester bin un estudio huridico, si ta posible pa bin cu permiso pa hotel all inclusive y na di dos lugar, kico ta e impacto economico den esaki. No tin un estudio realiza y si tin Parlamento no conoce. 

Segun Andin Bikker gobierno no a haci ningun tipo di estudio. E parlamentario a splica cu aparentemente tin un estudio haci pa Water Price House Coopers, na 2005, te dia awe ta un misterio, PDR no a mire, of alomenos e no a yega Parlamento te ainda aunke, aparentemente, e ta existi. E parlamentario a indica cu e sa cu tin otro rapport cu gobierno a referi na dje den e memorie van toelichting, di splicacion riba e ley di 16 di Januari di e aña aki, cu tampoco a yega Parlamento nan a haye. 

Parlamentario Bikker ta puntra su mes, ta ki tipo di respet gobierno tin pa Parlamento, si Parlamento tin cu bay busca aki aya, pa haya documentacion na cual e ta referi na dje riba un ley. Ta via corant riba un estudio cu Gobierno a ricibi, cu ta referi na e ley di “all inclusive”.  

Bikker ta bolbe recorda cu Raad van Advies a bisa gobierno pa no presenta e ley aki den Parlamento, y ademas a indica cu falta estudio y pa por fabor pidi Sociaal Economische Raad un estudio di impacto economico riba esaki. Pero te ainda esaki no a wordo haci, apesar cu eigenlijk e ta e instituto indica pa haci un tipo di estudio asina.

Un ley cu a drumi di cinco pa seis luna den e buro di Minister, anto aworaki el a mande Parlamento y diripiente e tin pura cune.  Tur e tempo aki el a drumi den luz berde, anto, bo no ta mande Parlamento y Parlamento mester core pasobra bo tin urgencia pa trata e ley akinan. Un ley cu ta contra nos Constitucion, y PDR a analiza esaki a base di Hurisprudencia, y e ta en pugna cu e derecho di maneha y tin propiedad priva.

Segun Andin si e ley wordo aproba y keda intacto hecho ta cu tur restaurant y bar cu tin un vergunning, bao ordenanza di permiso cu ta regula all inclusive tambe gobierno lo regula e benta di productonan den restaurant y bar.

“Durante campaña pa eleccion di 2013 PDR no por corda cu partido AVP, cu a bay cas pa cas, por a bisa cu nan tin un ley di tal envergadura cu basicamente ta na rand di comunismo moderno.

Bikker ta desea pa Partido AVP splica un rato di unda e tin e mandato electoral cu e por kere cu e por bin cu un ley mal traha, mal pensa, contra nos Constitucion, sin cu e tin estudionan apropia pa esaki, of cu si a existi mes no a yega Parlamento, anto tog ta keda insisti pa trata e ley aki mas pronto posible.

“E unico pilar economico cu nos a resta ta turismo y e gobierno aki sin un estudio debido kier a experimenta cu e pilar aki anto nan no tin mandato pa esaki ni lo dune tampoco. Ta hopi preocupante e falta di respet cu gobierno ta desplegando pa Parlamento, door di no duna nos informacion, door di no haci estudionan debido, door di no paga atencion na e consehonan di Raad van Advies, anto nos ta lamenta di wak cu e democracia na Aruba no ta funcionando, pasobra gobierno no ta duna e respet cu Parlamento merece, y cual Parlamento ta exigi. En todo caso, Parlamento ta para ariba cu nos Constitucion no ta di ningun partido, e ta di Aruba y nos ta representante di pueblo y como tal, ta exigi respet!” segun Andin Bikker.

Expresionnan haci den e articulo aki no necesariamente ta refleha opinion di ArenaPoliti.co