Parlamentario a bisa cu Minister presidente Eman nunca tabata convenci pa habri bek e refinería, pero mas bien a papia di desmantelacion, y ta ora PDR a pasa un moción na Mei aña pasa y a invita señor Nelson English y hasta a manda un carta pa Valero pa haci un apelacion riba nan pa para e desmantelacion, cu prome minister numa, a mira cu e economía di Aruba no ta move, cu el a wordo convenci. Y semper ta papia cu AVP tin un dilema pa Sanicolaas 

Pero después el a sigui viaha rond mundo, spaar su air miles y awor atrobe a bin den picture ta sunchi man di presidente. Por lo demás PDR no por a discerni ningún momento cu e ta activamente envolví den e reapertura di e refinería pero awor ta bin pronk comosifuera cu el a logra algo. “Den mi concepto, esnan cu a traha riba esaki ta mi persona sr. Glenbert Croes, sr.Mike de Meza. E comisión cu a wordo instala a base di mi moción, y e grupo PARA cu a organiza diferente encuentro na San Nicolas, pa convence e ministernan, incluyendo Mike de Meza, cu e reapertura di e refinería ta beneficioso pa nos economía”.

Andin Bikker ta haya ironico y stranjo esaki, y e ta kere cu lo tabata elegante si nan lo a reconoce cu nan NO tabata convenci di e beneficionan aki, y cu na prome instante nan a pensa riba desmantelacion “pa pretende awor cu ta  nan a keda insisti riba esaki, no ta cuadra cu realidad, y hecho ta cu oposición encabeza pa mi persona y sr. Glenbert Croes a keda insisti riba esaki y a convence gobierno den bienestar general di nos pueblo” Andin Bikker a bisa cu énfasis.

Expresionnan haci den e articulo aki no necesariamente ta refleha opinion di ArenaPoliti.co