Recordando Augustus Scur 1977:

Awe 10 di augustus ta recorda 39 aña di inicio di un huelga general y un Aruba  den scuridad total                                                                                                                                                      

Siguiendo cu e historia di e lucha durante e Augustus Scur 1977, riba un dia manera awe 39 aña pasa, Sindicatonan den Union a proclama un huelga general, caminda a pone trabao abao, a subi caya y unda e sindicato di WEB a notifica gobierno cu lo bay kita coriente y consecuentemente esey a trece problema pa suministro di awa tambe. Henter e situacion a bira pio ora cu dos sindicalista, esta presidente di IOWUA, Chinto Geerman (dfm) y tambe Juan Yarzagaray a wordo deteni pa motibo di distribucion di un pamfleta cu contenido hopi fuerte y caminda a anuncia cu paz y trankilidad lo wordo suspendi riba e isla aki. Riba e anochi aki un gran cantidad di manifestante bao liderazgo di Betico Croes a reuni urgentemente na Centro di Bario Noord y despues a bin protesta dilanti warda di polis na Playa y pa despues bay protesta dilanti cas di Officier di Husticia, sr. Arps kende a bay baha bandera di Aruba cu tabata bula dilanti Oficina di Gobiero.

Un ola di protesta

Riba su dia siguiente, esta 11 di augsutus 1977 coriente a cay afor, henter nos comunidad a keda den scuridad total y Aruba a bay plat. Un ola di protesta a surgi na tur parti y pa dianan largo Aruba tabata paralisa. Dilanti warda di polis na Playa a ser organisa un demostracion masal y dilanti di Oficina di Gobierno tabata tin disturbio y tiroteo. Tambe Polis a haci uzo di traangas y kinsena contra e manifestantenan. E tension bao di pueblo a sigui crece, pero locual a causa mas indignacion tabata ora cu Riot Comando a ser manda for di Corsou bao mando di Castillejo Cova, cu a bin marcha den cayanan di Oranjestad pa mustra nan poder. Mester remarca cu na Aeropuerto e avion cu a trece e Riot Comando na promer instante no por a baha, pasobra a blokia e pista cu e autonan di Cuerpo di Bombero, consecuentemenrte e avion mester a bolbe subi pa evita cu cosnan grave lo a sosode.

Tambe a ser tira riba e jeep di Betico Croes y varios persona a ser herida. A ser tira riba otro autonan tambe mientras cu e edificio di Gobierno a keda marca pa bala door di Riot Comando. Na Santa Cruz, Riot Comando arma te na djente a invadi e cas di mayornan di Betico Croes mientras cu e pueblo a wordo humiya y bochorna. Cerca di Wilhelmina Stadion tres hoben Arubano casi a perde nan bida ora cu Riot Comando a tira riba nan.

Delegacion pa Hulanda

Sinembargo e gran mayoria di pueblo no a sucumbi pa tur e intimidacionnan aki y den forma decidido a sigui lucha pa salba honor y dignidad di e pueblo aki. Riba dianan 18 y 19 di augustus 1977 Eilandsraad a reuni unda a dicidi cu – a base di art. 16 di Eilandenregeling - lo manda un delegacion Hulanda pa papia riba e futuro structura estatal di Aruba.

Mirando e situacion alarmante, porfin Hulanda a dicidi di acepta un delegacion Arubano, consistiendo di representantenan di tur sector di comunidad. Den e reunion aki Aruba a logra convence Hulanda cu Aruba tin e derecho di dialoga directamente cu Hulanda, sin intervencion di Gobierno Central.

Esaki ta en breve locual a sosode durante e accionnan di Augustus Scur 1977 y cu ta bay den historia como un periodo determinante den e lucha di nos pueblo pa su libertad. Ta danki na e accionnan aki awe Aruba ta goza di su Status Aparte, esta un pais autonomo den Reino Hulandes cu su propio Gobierno, propio Parlamento, propio Gobernador, propio Banco Central cu nos propio florin Arubano etc. Ta p’esey, laga e dia di awe ta un dia di reflexion pa un y tur den e pais aki gara e bandera y sigui lucha pa conserva nos libertad cu a ser logra a base di sanger, sodor y lagrima, bao liderazgo di e gran estadista y Libertador Betico Croes.