Awe ta recorda e prome aña di traicion di nos autonomia! 

Awe 27 di augustus ta un dia riba cual nos ta recorda con un aña pasa nos autonomia financiero a ser traiciona door di e ministro y parlamentarionan di AVP y cu nan a entrega esaki directamente den man di CAFT y Hulanda. E origen di henter e entregamento di nos autonomia financiero a origina ora cu Gabinete Mike Eman a haci un desaster cu nos finansa publico caminda durante añanan largo nan a crea deficitnan financiero di mas cu 400 miyon florin pa aña y consecuentemente un redoblacion di nos debe nacional yegando te na mas cu 80% di nos GDP. E resultado tabata cu e gobierno di AVP a haya un Aanwijzing y un KB for di Hulanda y cual finalmente a desemboca den institucion di un Comision Supervision Financiero, esta CAFT pa Aruba. 

Provocacion y menasa
Echo ta cu e politiconan di AVP no tabata tin y te ainda no tin ningun tiki balor pa nos autonomia financiero ya cu nunca nan a lucha pa Aruba por a haya su libertad, su Status Aparte. Cu awe nan por ta sinta riba e stoel di ministro y parlamentario ta danki na e lucha tenaz y sacrificionan cu a ser hiba den pasado door di Arubianonan balente cu stimacion pa e pais aki.
Riba e dia di traicion mes, esta e dia di votacion pa institucion di e ley di CAFT, nos por a mira un organisacion completo bon hinca den otro pa silencia voz di esnan cu si realmente ta para na vanguardia di nos autonomia. E gobernantenan cobarde a pone yen di coordinador cu ta cobra sin traha for di tempran blokia entrada di e tribuna di Parlamento pa laga nan hendenan so drenta. Nan a laga nan hendenan arma cana rond den gang pa busca problema cu provocacion y menasa. Algo nunca bisto ta cu yen di polis den sala di Parlamento tabata presente pa cuida e cobarde y traidornan di AVP, anto for di eyden tabata coordina pa abusa di pueblo cu tabata manifesta parti pafor.

Victimanan di opresion
Tabata for di oranan tempran di mainta di e dia ey cu sindicatonan na un forma civilisa a pidi pa wordo scucha den cas di pueblo, esta nos Parlamento. Sinembargo Presidente di Parlamento a keda tene nan na liña y despues a dal porta cera den nan cara cu consecuencia cu e atakenan riba parlamento a cuminsa. Fraccion di MEP a pidi pa schors e reunion un rato y scucha e sindicatonan pa asina baha e tension cu tabata creciendo pafo di edificio di parlamento, pero e presidente a nenga y ta te despues cu reunion a caba den cual 13 parlamentario di AVP a vota na fabor di e ley di CAFT, el’a invita nan pa papia pero e ora ey e baca a hoga caba. Net ora cu e reunion a termina simultaneamente e coordinadornan a cuminsa tira boter riba e multitud y como consecuencia cu cosnan a sali for di man. Gabinete Eman manera un gran cobarde un biaha mas a manda Riot Comando bon arma contra e manifestantenan y varios tabata e manifestantenan cu a bira victima di opresion y dictadura despues cu nan a haci uso di nan derecho fundamental di manifesta y mustra nan repudio pa e forma con nos autonomia financiero a ser traiciona.

Manipulacion di evidencianan
Awe cu nos ta recorda e prome aña di e fecha di traicion di nos autonomia financiero te ainda gobierno no a laga haci un investigacion imparcial di loke realmente a sosode dia 27 di augustus 2015. Alavez ta di lamenta cu tur evidencia pa loke tabata e provocacion cu a sali di e coordinador y siguidornan di AVP for di edificio di Parlamento contra e manifestantenan a wordo manipula y kita, ya cu su dia siguiente caba Minister President hunto cu su siguidornan a laga bari, limpia y verf e edificio di Parlamento y asina logra na kita tur evidencia di tiro for di armanan di candela di nan propio siguidornan. Increibel, pero esaki tabata e realidad cu nos a biba y ta bibando aden te cu awe!
Finalmente, laga e dia di awe ta un dia di reflexion pa tur hende riba Aruba bira consciente di e traicion cu e gobernacion actual a comete contra e pais aki y cu nan por haya e inspiracion pa sigui lucha y finalmente logra, mescos cu e eliminacion di e cadena di traicion di 12-8, elimina tambe e supervision financiero imponi riba nos pueblo y esaki danki na e malgobernacion di AVP.

Expresionnan haci den e articulo aki no necesariamente ta refleha opinion di ArenaPoliti.co