Mi a dicidi di join e organizacion politico Red Democratico pasobra te dia di awe, ReD ta e unico partido politico cu for di inicio ta para pa anti-corupcion y pa igualdad. Mi ta ripara cu tur dos ta temanan cu varios biaha personanan tin miedo di papia riba dje of mas ainda trece dilanti.

 

 

Hopi hende tin miedo pa trece e corupcion cu ta tuma lugar dilanti, pasobra respresaya lo ta e consequencia. Pa miedo hende ta escohe pa keda kieto y laga politiconan of nan compinchenan pasa trapanan.  Riba mercado laboral den sector priva mas cu claro tambe tin irregularidad. Debi cu no tin ley pa proteha e persona cu kier traha integro tin tanto abuso na Aruba. 

 

No por ta asina cu un hende cu ta trece corupcion dilanti na Aruba ta bira victima di su mesun voz, di su mesun integridad. Tin hopi ehempel na Aruba di esaki. Ami mes a pasa y ta pasando den dje. Mi por mustra con malo e trias política ta traha y con Arubianonan cu kier contribui ta wordo silencia.

Pesey mester bin ley y reglanan pa habri caminda pa corrupcion bin na luz. Ley y regla pa proteha e ciudadano cu ta trece irregularidad dilanti. Proteccion huridico, financiero y psychologico. Hopi biaha e persona ta wordo tortura pa asina e cansa y no por funciona mas y mester bai keda cas malo of e ta wordo poni riba ‘non-actief’. 

 

Na paisnan manera US, Suiza, Canada, Noruega y Hulanda ya ta basta avanza pa regula esaki. Na Aruba nos no mester inventa e wiel di nobo, sino adapte den e situacion cu ta apto pa Aruba. 

Na Aruba a para bira cu poder ta mas cu ley. Ciudadanonan mester lanta para y stop esaki.

 

 

Na Aruba mester bin hopi atencion pa igualdad y pa duna tur categoría di hende nan derecho cu ley ta perscribi, paso tur tin diferente puntonan pa atende cune, manera hende grandi 60+, enfermonan, muchanan, hoben, hende muher, hendenan encarcela ectera.  Ta increible con costumbra nos ta pa wak derecho humano wordo viola sin consequencia, esaki dijs paso poder ta mas cu ley. No por!