Otro siman lo ta un siman historico pa nos Pueblo unda cu finalmente Parlamento di Aruba lo duna su aprobacion na e ley pa autorisa traspaso di tur e bienes, facilidadnan y companianan di Valero pa Gobierno di Aruba su compania di Pueblo: REFINERIA DI ARUBA N.V. (RDA) y pa tambe e operacion wordo traspasa pa PDVSA CITGO. E ta un hecho historico cu e refineria di Aruba finalmente ta pasa di man privá pa Gobierno/Pueblo. Pesey nos ta lamenta profundamente e mancha cu Gabinete Mike Eman kier pone riba full e tratamento di e ley aki den Parlamento cu su maltrato, provocacion y falta di transparencia den e scrutinio parlamentario cu mester tuma lugar.

Nos sa cu AVP kier provoca MEP vota contra e logro di nos Pueblo cu MEP a lideriza den e lucha entre otro di e anochi di ACCION ORA CERO na Cede di MEP den reunion extraordinario y despues den e ACCION ORA CERO DI PUEBLO na main gate di Valero na San Nicolas.

MEP TA PRO E REAPERTURA DI REFINERIA PASOBRA MEP TA PRO SAN NICOLAS PRO ARUBA PRO NOS PUEBLO PRO TRAHADORNAN LOCAL CU LO HAYA TRABAO BEK, Y PRO E CONTRATISTANAN LOCAL CU LO HAYA TRABAO BEK DEN E REFINERIA.

Nos kier expresa nos gran preocupacion cu e hecho cu awor cu finalmente tur companianan di Valero ta pasa pa Gobierno di Aruba/Pueblo, nos ta constata den e memorie van toelichting di ley pa reapertura di e refineria cu Gobierno di AVP kier bende Valero Marketing & Supplies N.V. cu sponsernan di AVP mientras cu e compania aki ta pasa pa e compania di Gobierno: Refineria di Aruba N.V. Como MEP den nomber di nos Digno Pueblo cu nos kier categoricamente laga sa cu nos lo NO permiti Gobierno bende niun di companianan di Valero cu ta pasa pa Pueblo cu niun sponser di AVP. Tur compania cu tin un posicion monopolistico y estrategico pa nos Pais mester ta den man di Gobierno pesey, si encaso Gobierno di AVP cu e 12 miembronan di Parlamento bende toch, di awor nos di MEP ta anuncia cu un Gobierno nobo di MEP lo nationalisa e companianan aki pa nan tur ta bek den man di Pueblo.

Ademas e gasducto cu lo bin di Venezuela ta di vital importancia pa nos yuda WEB N.V. elimina e factor di brandstof clausule den e structura di prijs di produci awa y coriente, yuda WEB N.V. elimina e crimen contra nos Pueblo di HEDGING, pa asina PERMANENTEMENTE BAHA PRIJS DI AWA Y CORIENTE PA NOS PUEBLO y pa asina autonan na Aruba por core a base di gas como alternativa na gasoline cu ta demasiado caro y di mal calidad.

Finalmente nos kier bisa cu fundammentalmente pa MEP ta: TUR TRAHADOR LOCAL MESTER HAYA TRABAO PROME, TUR CONTRATISTA LOCAL MESTER HAYA TRABAO PROME PA ASINA SIGURA CU E REFINERIA DI ARUBA BENEFICIA ARUBA NA PROMER LUGAR. UN GRAN PABIEN NA NOS PUEBLO.

Glenbert F. Croes
Miembro di Parlamento MEP

Expresionnan haci den e articulo aki no necesariamente ta refleha opinion di ArenaPoliti.co