Prome Minister Mike Eman su gobierno a pasa e ley controversial pa regula All-inclusive y Other Accomodations den Parlamento di Aruba no mucho tempo pasa. Awo a sali na cla cu ta pa falta di e propio gobierno aki e dos fenomenonan aki a haya raiz den nos pais. A gasta 80 Miyon di ATA y te hasta e fondo di emergencia, anto awo a resulta cu anualmente ta alrededor di 600.000 turista a keda na nos hotelnan entre 2014-2015. Esaki ta un maneho hopi desastroso kibrando e unico pilar economico cu varios generacion a traha pa awe nos pais ta un di e top islanan den Caribe. Minister di Turismo a destrui nos unico pilar economico cu ta pasando den momentonan financiero/economico sumamente dificil. Tur e logronan di e Minister di Turismo tawata ficticio. 

San Nicolas por bira alternativa
Segun e compania Resonance, nos pais tin un problema di siguridad. Tin varios punto tambe cu a ser menciona: Calidad di Cultura, experiencianan culinario, sightseeing y deporte. Den averahe nos isla a score basta halto riba varios punto, anto esaki ta hustamente unda mi ta kere cu San Nicolas por bira e alternativa pa completa nos pais como uno di top calidad. Lamentablemente despues di 7 aña a gasta hopi placa den tur sorto di Festival, Conferencia y siman pasa un Festival di Arte combina cu un conferencia di Happiness organisa pa ATA, unda a gasta $250.000 pa mentor y ex-lider fracasa di AVP di e actual Minister di Turismo cu a analisa con contento nos habitantenan ta. Sr. Tico Croes tawata esun cu tawata lidera partido AVP den e periodo di Fondo Desaroyo San Nicolas unda 52 Miyon florin a cria pia y cu un tal Otmar tawata coordinador di e Minister. Tambe Sr. Tico Croes tawata e unico Minister di Finansa cu a wordo condena pa fraude den gobernacion den un caso penal. Nos no por lubida tur e problematica di Bushiri Hotel/Hard Rock cu a caba na nada.

Fiesta cu permiso
Minister Dowers a bira e victima di e mal maneho di su coleganan ministro, unda IASA ta mustra claramente cu tin un fiesta andando cu miles di hende cu ta pretende di drenta Aruba manera "turista" cu tur e consecuencianan negativo cu esaki ta trece cun’e. A lubida cu Aruba ta un isla hopi chikito compara cu paisnan sumamente grandi den region. Un camber di hotel na Aruba ta costa $150 pa anochi y con e hendenan aki por tin e placa ey pa keda na hotel? Dimes Other Accomodations a crece na nos pais door di e mal maneho di GE I y II. Cifranan alarmante di ‘turistanan’ cu a keda na nos isla indocumenta y cual ta prueba palpabel cu fiesta tawata tin na DIMAS bao di Minister Benny (90.000m2) Sevinger. Su coordinador a wordo saca di dicho departamento y awo ta na Kadaster. Actualmente tin algun Hulandes Europeo cu ta traha den dicho departamento pa frena e bagamunderianan cu tawata pasa eyden. Awo e Minister ta pretende otro, pero esey ta e realidad cu e kier admiti of no. Minister Dowers tin su lomba contra muraya cu e criminalidad y atraconan creciente den nos pais. Minister Sevinger a hiba un maneho di 180 dia pa "turista" na un manera hopi iresponsabel anto awo esaki ta e resultado. Pues ta bisto cu e gobierno aki nos no por planta cu su awa.

Expresionnan haci den e articulo aki no necesariamente ta refleha opinion di ArenaPoliti.co