El a papia di union en bes di partidonan politico. 

ORANJESTAD- Prome Minister Eman den su discurso y contestacion durante reunion den Parlamento riba e ley di CITGO, tabata maestral, emocional y hopi al caso pa  loke ta tumando lugar den Parlamento awe. "Poco bes den bida y den carera di un Mandatario of un Parlamentario e ocasion ta surgi cu e por duna su voto riba un ley di un embergadura manera esun cu tin awe riba mesa. Nunca antes tabatin un ley cu mi por corda durante e ocho añanan cu mi ta den gobernacion, cu nos a pasa un ley cu tabata asina grandi."

Premier Eman: "Nunca antes mi por corda cu nos a yega di trata un ley cu ta bay hisa economia di Aruba di un forma evidente manera e ley di CITGO. Nunca antes mi ta corda cu nos a trata un solo ley cu ta ofrece cuponan di trabou na abundancia y ta percura pa entrada di gobierno ta subi cu 60 pa 80 miyon. Tur esaki basa riba un solo decision."

"Nunca antes tabatin un ocasion historico manera esun di awe cu Aruba pa prome bes ta bira doño di su propio refineria. E ta algo bisto, algo evidente, historico y determinante pa e curso di nos pais. Tur esaki basa riba un solo decision."

Eman: "Mi a scucha oposicion cu hopi atencion pasobra cu e votacion di awe lo defini e futuro di e pida baranca aki. Mi ta spera cu mas laat nos por ta orguyoso di por bisa cu Aruba a bini hunto, organisacionnan a bini hunto,  partidonan politico a bini hunto y hunto nos a bisa SI na e ley aki."

Ora aki 50 aña cu historia di e pais aki wordo skirbi unda e embergadura di e ley aki wordo describi, nos ta bay keda chikito banda di e impacto cu e decision aki tabatin riba e futuro di Aruba. Un decision cu ta defini ken nos ta como hende. Hendenan cu a pone interes di e pais versus interesnan propio y interes di pais a vence. Hunto nos ta pone e banderanan politico un banda y hunto nos a lanta e bandera di Aruba, pasobra hunto nos ta para pa felicidad di nos pais."

"Mi kier ta hopi sincero. Nos no a yega aki sin a pasa den momentonan di dilema, den momentonan di profundo reflexion, y momentonan unda e berdad sunu tabata riba mesa. Momentonan cu mi tabata pensa kico e decision aki ta nifica pa mi, pa mi vision berde, mi vision riba sostenibilidad. Mi a tuma e decision pa sigui hunto cu mi colega de Meza."

Expresionnan haci den e articulo aki no necesariamente ta refleha opinion di ArenaPoliti.co