Si nos lesa den social media y scucha e clamor di e pueblo nos lo bira malo di berdad! Ta pa basta tempo caba cu tin hopi keho riba e maneho cu AZV ta hibando pa loke ta e personanan cu pa un of otro motibo di salud mester bay den exterior pa haya un mihor cuido. No ta pornada AZV a wordo introduci, pero nos ta mira con esnan encarga cu e asunto aki poco poco a desvia di e meta inicial, esta di duna un cuido optimal na nos pueblo. E cuido tabata optimal y mester keda asina! Mi ta haya lamentabel cu famianan di un criatura cu a nace cu un malesa congenito, cual mi sa bon cu AZV no ta cubri, mester acudi na pidi placa pa haya un cuido y cu dia pa dia ta hinca e famia den mas desesperacion y dolor mirando cu dianan ta pasa y no ta mirando un solucion pa nan familiar cu ta pasando den un situacion dificil. 

Discriminacion inhumano 
Tambe tin otro caso lamentabel di un famia cu a pasa den un situacion basta lamentabel y doloroso na Colombia na unda e persona a fayece y a wordo trata inhumanamente pa esnan encarga cu e hospital na Colombia. Mi tambe sa, segun ley di AZV, cu si bo bay busca ayudo medico den exterior riba bo mes, AZV no ta cubri esaki y abo mes mester paga tur e gastonan. Unicamente si bo a haya OK pa bay afor y bo mes dicidi cu bo kier bay un otro clinica, e ora bo ta haci uso di e mesun leynan di AZV pa bay na e clinica di bo preferencia, bo ta haya parti di e gastonan paga ora bo bin bek y esaki despues di mustra bo recibonan. Pero locual mi ta haya lamentabel ta cu, apesar cu AZV tin bon stipula kico por y kico no por, gobierno ta duna permiso di estadia na muchanan cu malformacionnan of malesanan genetico cu ta biba aki y hasta cubri tur e gastonan cu esaki ta trece cun’e! Pero pa nos muchanan cu a nace cu cierto malesanan cu no ta wordo cubri door di AZV, gobierno si no por yuda! Ta un discriminacion INHUMANO di parti di e Minister di Salud, sr. Schwengle y Promer Ministro, sr. Mike Eman! 

Actonan condenabel
Tin personanan cu placa, cu por paga pa nan tratamento y cu a yega di haya nan tratamento cu no tabata wordo cubri door di AZV, paga toch door di gobierno y e ora ey SI tabata por.Ta esaki ta e sorto di cosnan, abusonan cu ta pone mi pensa y dicidi di CONDENA e actonan aki. AZV a wordo crea pa duna cuido di calidad na PUEBLO DI ARUBA. Te na unda cu mi sa esaki no a cambia, of si? Momento a yega pa e Ministro di Salud sali padilanti, duna cara y mustra intencion pa bin cu un mehoracion den e sistema aki, cu no ta promer biaha cu ta pone bida di hende na peliger y cu a costa bida di basta hende. Mi sa cu hopi hende lo bisa cu mi sa mihor, cu mi sa con e ley di AZV ta traha, etc,etc. Ta berdad! Pero mi no por evita di mira e parti humano di e casonan aki cu ta toca curason di hopi hende,dunando rabia y malcontento pa e manera con esaki ta wordo trata. Mi por bisa cu casonan cu mi mes a mira, di ilegalnan cu a wordo manda cu Air Ambulance pa tratamento medico den exterior, cu tur gasto paga y ta ken a paga? Tambe hendenan ("ta nos hendenan") cu a yega di haya tratamentonan paga cu a costa hopi placa sin cu e tabata riba e lista di AZV, pero claro, ta depende ken bo ta, ki color politico bo tin y ta ken ta amigo di ken. Danki Dios nos ta vislumbra un cambio den horizonte, sin duda! Esnan cu conoce mi y sa kico mi ta papia lo ta di acuerdo cu mi!

Berguensa y mas berguensa
Mi ta tende hopi biaha di derechonan humano p’aki p’aya, pero ora ta toca derechonan humano di nos mesun hendenan, sr. Mike Eman ta lubida cu e mester goberna pa pais Aruba y pa e Arubianonan! Of por ta mi ta robez y mi ta mucho emocional? Mike Eman, Prome Minister di Aruba, bo a faya como gobernante, bo a faya den bo deber como Prome Minister pa percura pa bo ciudadanonan y ora mi mira cu un ARUBIANO a muri na Colombia, a wordo trata INHUMANAMENTE y bo no a saca niun dede pa yud’e, mi mester bisa bo publicamente, SHAME,SHAME ON YOU!! Ta tristo cu bo mesun hendenan cu a campaña pa bo Ministro di Salud y sabiendo como medico di pulmon di su condicion e no a haci nada pa dirigi y yuda e persona aki. Mi no tin nada otro di bisa bo cu bo a FAYA! E casonan aki mi ta spera cu nan lo no pasa NUNCA mas y si e ta den mi man, mi ta sigur cu lo mi haci tur cu por pa yuda! Sorto di casonan asina ta trece hopi reaccion, sigur di e compinchinan di gobierno. Un mensahe pa boso: Bin cu argumento y nos lo por debati. Manda un hende capaz si, por fabor! Cada bes mi ta bisa mesun cos: Ora un persona, pero sigur ora ta trata di un homber, perde su credibilidad no tin nada mas di haci. Keda habri boca y bisa nada ta mustra claramente kico bo ta!

Beneficio di duda
Mi ta manda palabranan di profundo condolencia na famianan di e fayecido y cu Dios por duna boso fortalesa pa pasa den e dolor di mira boso ser keri sufri na man di poco burdugo sin sentimento. Mi lo keda vigilante pa e casonan aki pasobra tin varios asunto pasando cu mester di atencion y nos Ministro di Salud no ta haci nada! Bay Brasil gasta placa di pueblo pa haci kico? Pero nos muchanan atleta mester bende rifa y BBQ pa por bay competi den exterior y representa Aruba! Con bo ta haya e cos aki, minister Schwengle? Na cuminsamento mi a duna bo e beneficio di duda, pero awor si bo a comproba cu bo no ta apto pa e puesto di Ministro di Salud. Sorry pa mi sinceridad. Mi ta spera cu mi por tin un oportunidad pa papia tocante hopi caso menos bon pasando den nos salubridad publico cu tin mi atencion y di bo parti, cero cooperacion!

Expresionnan haci den e articulo aki no necesariamente ta refleha opinion di ArenaPoliti.co