E situacion di nos turismo e anja aki lamentablemente no a conoce un mehoracion. Nos a haya awe na ATA un presentacion di riba e cifranan di anja 2016 y tambe con e pronosticonan pa anja 2017. E ultimo 2 anjanan aki 2014 y 2015 Aruba a experiencia un turismo cu NO ta solido. Pa 2 anja largo tawata tin crecmementonan ficticio den cantdiad di bishitante y esaki tawata debi na e crecemento inusual for di turistanan for di Venezuela. Awe ta resulta cu pa 2 anja largo a regsistra cada anja 200.00 turista cu NO tawata turista y asina e bende pueblo un 6 pa un 9 y bisa pueblo cu turismo lo ta bayendo bon. Mi no ta kere ta tarea di un minister di turismo of un gobierno ta pa manipula pueblo y ganja pueblo cu turismo ta bon. Ta na su lugar pa semper nos papia cu e berdad nos dilanti.

Durante e presentacion cu miembronan di e commission fiho di turismo a ricibi a sali na cla cu anja 2016 lo ta un anja hopi dificil. E anja 2016 tur indicador den nos turismo ta demostrando un tendencia negativo. Nos mester menciona cu e anja aki ATA a inverti mas placa cu unca den mercadeo mirando cu nan a anticipa caba di comienso cu e anja aki lo ta un anja dificil. Tin algo cu ta bayendo robez pasobra no por ta asina cu ta inverti mas placa den mercadeo y e resultado pueblo no ta mire ni sintie. Ta obvio cu e maneho di minister di turismo a enfoca riba cantidad di turista y no calidad. E anja aki tin te hasta un caida di 4% den cantidad di placa cu turistanan ta laga atras. Placa di mercadeo ta wordo inverti no solamente pa trece e turistanan Aruba pero mi ta kere e enfoke mester ta pa trece esnan cu realmente ta gasta placa den nos economia cual lamentablemente nos e pasa e ultimo anjanan aki.

Mas preocupante aun ta e hecho cu e anja aki tawata tin caida registra den practicamente tur luna di anja den cantidad di bishitante. Den e tabel aki ta wordo ilustra con malo nos turismo ta bayendo e anja aki:
Na e momentonan aki mester bin accion di immediato pa remedia e situacion di crisis cu tin cu a wordo ocasiona pa e maneho di minister Otmar Oduber. E cifranan ta papia pa nan mes y e ta preocupa nos e situacion cu tin actualmente den nos turismo! Na fin di anja 2016 segun tur e proyeciona di ATA lo tin un caida de 4% den cantidad di bishitante, un caida di casi 4% den cantidad di placa cu turistanan ta laga atras, un caida den REV PAR di 2.6% y te hasta un caida den e NET RESULT di ATA. Segun e proyecionan di ATA cual ta proyecionan conservativo, otro anja e NET RESULT di ATA lo ta unicamente 477.00 flroin cu e risico cu ATA lo por corre den corra pa promer biaha! Esaki ta e situacion actual den nos turismo!

Expresionnan haci den e articulo aki no necesariamente ta refleha opinion di ArenaPoliti.co