Na anja 2014 promer minister Mike Eman a somete su mes na un welga di hamber pa un diferencia di opinion cu Hulanda riba prespuesto di anja 2014. No solamente e la pone su mesun cara na berguenza sino pone cara di henter nos pueblo na berguenza pasobra despues di algun dia e mester para e welga di hamber aki sin ningun resultado. E tempo ey e la haya un Koninklijk Besluit colga riba su cabez y sigui pa e anja siguente, esta 2015 un supervision financiero CFT. Na e momentonan ey cu fraccion di AVP a vota pa CFT haci su entrada na Aruba y bira ley nos pais a perde nos autonomia. Mike Eman ta esun culpabel y esun responsabel pa cu esaki mirando con e la goberna e pais aki pa e ultimo 7 anjanan aki. Un gobernacion cu a carectirisa su mes na derocha placa di pueblo, yuda amigonan serca, famianan cu fabornan politico. Fiesta cu tereno y patrimonio di pueblo pa despues esakinan wordo bendi y crea probleman social y un pobreza hamas antes bisto. E debe actualmente di pais Aruba ta na 4 biyon y si conta e e proyectonan PPP nos debe a yega 6 biyon florin. Despues cu CFT a haci su entreda na Aruba Mike Eman a haya ta cuminsa presenta presupuestonan cu ta cuadra cu e normanan poni door di Gabinete Oduber. Contra su boluntad e mester a corregi e presupuestonan cu a sali for di man.

Na comienzo di e anja aki ja tawata conoci cu nos pais lo mester conoce un gobernador nobo. E proceso pa nombra gobernador pa nos pais semper a cana e caminda cu e mester cana, te ora Mike Eman a drenta den gobierno. Mike Eman no solamente e polarisa e relacion cu reino cu su manera di goberna si a ocasiona irritacion grandi serca gobierno Hulandes pa su manera irresponsabel di atende cu asuntonan serio di nos pais. Mike Eman a hanya 1 anja di tempo pa presenta un lista di posibel candidatonan pa gobernador y e NO A HACIE. Pa hopi largo hopi hende a keda specula kende lo ta e candidatonan.

1 dia promer cu e "deadline" pa entrega e lista di nombernan pa Hulanda e la yama e lidernan di fraccion den parlamento pa un consulta serca dje pa presenta su lista di posibel candidatonan. 
Bo ta kere esaki ta responsabel? Bo ta kere esaki ta manera di busca consensus na Aruba? Ta kende por tumabo na serio si e mes NUNCA a tuma e proceso aki na serio.

Mike Eman a faya na anja 2014 y a ricibi un KB. Mike Eman a bolbe faya na anja 2016 y a bolbe haya un KB y Hulanda a nombra un gobernador contra boluntad di Mike Eman. Ta hopi cuestionabel y stranjo e manera con Sr Alfonso Boekhoudt a wordo ataca y lastra mirando e hecho cu ta Mike Eman mes a nombre Gevolmachtigde Minister na Hulanda. Mike Eman a demostra aki e tin double standards, sr Boekhoudt ta bon pa minister pero malo pa gobernador. En todo caso Mike Eman tin 2 strike y falta un mas pa pueblo mande cas!

Expresionnan haci den e articulo aki no necesariamente ta refleha opinion di ArenaPoliti.co