Pueblo di Aruba, atrobe un echo ta keda revela, pa henter mundo por mira y comprende, kico kiermen bon gobernacion. Den e caso aki mi ta referi na e cuestion unda e compania Insel Air Aruba ta wordo hiba corte door di e trahadornan pa motibo di incumplimento cu e.o. belasting di parti di e compania. E echo aki pa ken cu ta, lo ta castigabel y hasta cu baymento di prizon. Pueblo por corda un caso asina, manera esun di e doñonan di un restaurant hopi renombra aki na Aruba? E homber y e señora a bay cera pa motibo di acusacion di incumplimento cu belasting. Den caso di Insel Air esaki NO mag. Insel Air su medaya tambe tin dos banda! Un banda di medaya ta e incumplimento di parti di e CEO, sr. Nuboer kende ta responsabel pa esaki. Awor, sr. Nuboer no ta “zo maar iemand”. Absolutamente cu NO! Su persona a fungi como Inspector di Belasting na Aruba pa varios aña. Actualmente su persona ta miembro activo di Algemene Rekenkamer Aruba. E institucion cu ta controla y raporta tocante e cifranan di e aña fiscal di gobierno di Aruba. Un Top departamento di gobierno. Aparentemente integridad na Aruba door di AVP, a cambia pa integrishitdad.

E di dos banda di e medaya ta e propio departamento di Belasting/Bermudez. Con ta posibel cu un compania por keda sin paga e belasting, cu e compania ta retene di e trahadornan, sin cu SIAD ta manda boet of pone beslag of laga cera e doño of director? Pa colmo pa un tempo asina largo? Esey no ta pasa cu otro companianan na Aruba. Atrobe esaki ta un muestra di “vriendjespolitiek” y “verkrachting” di ley di parti GOBIERNO DI AVP? Siendo den e barco di AVP, tur asunto ilegal, corupto y malicia ta wordo permiti na bo. Awor ta keda sin draag af  belasting na gobierno. Aruba por corda e bendemento di tereno via un ‘accoord dezerzijds’ di minister Sevinger? Cuanto personanan ilegal ta wordo laga liber den nomber di ex- y ministernan di AVP? Despues e personanan aki ta pasa hari e polisnan tambe den nan cara riba caya! Viesedad ta keda limpi banda di gobernacion di AVP. Porkeria ta bunita palabra compara cu procedura di gobernacion di AVP. Ainda e dolor di parto ta na caminda pa e trahadornan di Insel Air.  
SIAD no ta worry cu mr. Nuboer no a pasa e placa pa nan! Ta e propio trahadornan ta keda responsabel pa PAGA e belasting na gobierno! Den caso di bancarota, e trahadornan tin cu paga un biaha mas! Ni Minister Bermudez ni sr. Nuboer ta worry kico lo pasa cu e trahadornan, pero e trahadornan mester sigui bisa “BON TRABAO”. Awor Pueblo di Aruba y e trahadornan di Insel Air sa unda nan placa a bay.

Expresionnan haci den e articulo aki no necesariamente ta refleha opinion di ArenaPoliti.co