UPP a tuma nota cu diaberna awor, dia 9 di december lo tin un caso den corte aki na Aruba, unda cu trahadornan di Insel Air a manda e compania corte pa incumplimento di traspaso di placa di pension y tambe belasting pa mas cu dos aña.
Riba su mes esaki ta algo cu sigur ta irreprochabel, mirando cu si un compania bay falliet, e trahadornan no ta gedek completamente pa nan pension, mientras cu nan lo keda cu un debe na Departamento di Impuesto.
E caso aki ta bira mas tristo ora nos wak kende ta CEO di Insel Air na Aruba, esta sr. Frederick Nuboer. Hopi ta e companianan Arubiano y tambe hasta piscadornan, e homber chikito a wordo hiba huez pa falta di incumplimento cu belasting. E tempo ey sr. Nuboer, aliado di e AVP tabata esun cu ta hiba e hende corte, como trahador di belastingdienst den pasado. E tabata den pasado fiscalista y ta bay corte pa belastingdienst contra esnan cu no a paga of a paga belasting di menos. Unda FIOD di Aruba ta awor aki? Dicon awor si belastingdienst y gobierno no ta tuma un paso contra e compania cu sr. Nuboer ta su CEO? Kico Minister Bermudez tin regla cu ne pa e compania aki? Acaso tin hende den belastingdienst cu tin man teni riba su cabez? Dicon aki si no ta haci inval na su oficina, manera si cu a sosode cu otro den pasado?
Mas tristo ta ainda cu e mesun meneer aki awor ta voorzitter a.i. di Controloria General (Algemene Rekenkamer) di Aruba. E ta e hefe maximo na e momentonan aki. Un persona mester juist toets e rechtmatigheid y doelmatigheid di gobernacion, particularmente loke ta e entrada y salida. Te na unda parlamento y minister por permiti esaki? Esaki sigur no ta cuadra cu henter e aspecto di Good Governance cu UPP semper a bin ta papia di dje.


7 di december 2016

Booshi Wever
Lider UPP
Brazil 163

Expresionnan haci den e articulo aki no necesariamente ta refleha opinion di ArenaPoliti.co