Despues di a firma acuerdo cu Qredits   

ORANJESTAD - Despues di e momento special di firmamento di e acuerdo entre Ministernan Eman y Arends den nomber di gobierno di Aruba y sr. Groenevelt di Qredits, un fundacion non profit cu ta facilita micro financiamento na entrepreneurs y start ups pa cuminsa nan propio negoshi, Minister di Asuntonan Economico Arends a hiba palabra. E tabata envolvi den realisacion di e proyecto aki desde un di su prome encuentronan cu sr. Groenevelt na Den Haag unda bou guia di Prome Minister Eman y de Meza a start e iniciativa aki cu miras pa reinforsa epilar economico  nobo. Esaki a bira un mision. Cu firmamento di e acuerdo e mision awor ta cumpli.

Minister Arends: "Como Minister di Asuntonan Economico mi ta masha contento cu nos a firma e acuerdo aki. Na 2011 despues di e prome rondenan di Dialogo Social nos a cera cu e sector financiero un MoU den cua semehante ideanan pa pone capital disponibel pa entrepreneurnan di negoshinan chikito a keda acorda." For di eynan a start cu e mision pa logra esaki.

"E plataformanan cu Aruba tabata forma parti di nan manera Europe meets the Americas a pone nos den contacto cu Qredits. Esaki ta prueba cu ora bo bay en busca cu enfoke total riba e instrumentonan pa fortifica nos economia, bo ta logra. Nos tur sa cu negoshinan chikito y mediano ta e columna vertebral di nos economia."Arends a conta con su antecesornan  Minister Hooyboer-Winklaar hunto cu AIB a lanta e programa pa empresanan chikito y mediano (SME)y Minister de Meza hunto cu Departamento di Asuntonan Economico a inverti hopi den programanan di Union Europeo pa coach y guia empresarionan nobo. “Departamento di Asuntonan Economico tin te hasta un seccion specialmente dirigi riba empresarionan chikito, esta IDEA,” e titular di Economia a splica. Pero e palabra cu semper tabata bin dilanti tabata 'capital'. "Cu of sin capital un idea fantastico ta haya bida of ta muri. Ta pesey mes cu Qredits ta algo asina necesario pa Aruba. E ta nifica tambe un diversificacion di nos sector financiero. Algo cu nos ta aplaudi masha tanto mes. Aruba tin un sector financiero masha stabil y solido. Cu binimento di un partner nobo, Qredits, esaki ta bira solamente miho. Tanto pa e empresario como pa e comunidad en general."

Qredits ta cuminsa otro aña na Aruba. E fundacion non profit ta otorga micro financiamento te cu 50 mil florin contra un interes di 8,75% y ta coach entrepreneurs durante e inicio di nan negoshi pa tur cos cana bon. Loke ta diferencia Qredits di e demas institucionnan financiero ta cu e instancia aki no ta pidi colateral pa e fianza. Aprobacion di e fianza ta basa primordialmente riba e plan di negoshi cu ta wordo presenta, como tambe e habitonan y motivacion di e empresario.

Expresionnan haci den e articulo aki no necesariamente ta refleha opinion di ArenaPoliti.co