Diaranson mainta dilanti di bestuurskantoor, Minister di Finanzas, Angel Bermudez a ricibi e grupo di duanero cu a manifesta den forma pacifico y asina tambe entrega un manifiesto cu varios punto basa riba e mal contento cu e condicionnan laboral actual di e duaneronan.

Presidente di e Sindicato Duanero di Aruba (SADA), Sharina Hernandez a hiba palabra pa indica kico ta e problema y preocupacionnan cu ta afecta e trabou di e duaneronan y a haci mencion di e oficina principal cu ta permanece den un estado deplorabel, falta di material y ekipo, ‘pensioengerechtig’ di duaneronan, falta di maneho adecua den duana, entre otro.

Segun Minister Bermudez, tur e puntonan menciona den e manifiesto ta asuntonan cu e tabata al tanto di dje caba y cu tambe a cuminsa traha riba nan. “Siman pasa ya caba mi a nombra un comision pa loke ta trata e ‘verhuizing’ for di e oficina principal como tambe un comision cu ta encarga cu e proyecto di e edificio nobo na Barcadera caminda nos lo aloca nos cuerpo di duana tambe. Nos tabata tin un reunion conhuntamente cu e ‘infrateam’ tocante e proyectonan aki y actualmente nos ta wardando riba e plan y diseño di e arkitectonan pa asina nos por cuminsa traha riba e edificio cu sigur ta di un di e aspectonan mas importante”, e mandatario a splica.

Na mes momento Minister Bermudez a indica cu en berdad tabata tin un cantidad grandi di ‘Landsbesluit’ cu ta sumamente atrasa, pues siman pasa mes e mandatario a percura di firma y completa centenares di ‘Landsbesluit’ cu ainda tabata tin pendiente. “Mi ta lamenta cu e documentonan aki tin un atraso asina grandi, sin embargo mi ta sigui haci lo posibel pa nan ta firma y pa entrega nan manera debe ser. Mi ta kere cu cada hefe di trabou mester tene su trahadonan na pecho y cumpli cu nan manera mester ta”, e mandatario a expresa.

Na varios ocasion aña pasa e mandatario a reuni cu e comision di SADA unda cu a papia tocante varios di e puntonan inclui den e manifiesto y aña pasa den luna di October, Minister Bermudez mes a realisa un bishita cerca e duaneronan na Aeropuerto Reina Beatrix  pa asina por papia mas di cerca cu nan y haya tende kico ta e mal contento cu e condicionnan di trabou y  asina tira un bista tambe riba e forma cu e duaneronan  ta traha na aeropuerto.

Manera Minister Bermudez a informa mainta durante e entrega di e manifiesto, e la ricibi e comision di SADA pa un reunion den oranan di atardi unda cu a  continua e combersacion cu e representantenan di e sindicato y tambe informa nan tocante e ultimo acontecimentonan respecto nan condicionnan di trabou. Na mes momento e ta sigura cu e trahadonan di e Departamento di Aduana por conta riba dje y cu sigur e asunto aki tin su debido atencion.

FIN

Expresionnan haci den e articulo aki no necesariamente ta refleha opinion di ArenaPoliti.co