Promer cu 1 di februari e plan mester ta cla. 
Gabinete Eman den presupuesto 2014 a presenta 24 medida cu nan lo tuma den 2015 y e proximo añanan pa asina por drecha e situacion financiero di nos Pais. CFT a tira bista riba presupuesto 2015 y a yega na e conclucion cu e medidanan aki no ta realistico ya cu Gabinete Eman no a duna of a duna demasiado poco informacion pa CFT por saca afor si e medida por wordo realisa. Pa e motibo aki CFT a pidi Gabinete Eman pa traha un plan y mustra con lo implementa e 24 medidanan cu e mes a propone. E plan aki mester keda presenta na CFT promer cu 1 di februari 2015.

Di e 24 medidanan aki ta solamente dos medida CFT ta considera realistico y cu Gabinete Eman a mustra di por bay sigi implementa sin problema. Ta trata di e medida nr 1 cual ta intensiva e cobransa di belasting. Ta trata aki di cobransa di mas loonbelasting, mas winstbelasting, mas grondbelasting y mas BBO. E otro ta medida nr 17 cual ta corta den subsidio pa e fundacionnan cu ta cay bou di Gobierno. Banda di esaki e fundacionnan mester corta den nan gastonan y bin cu propio iniciativa pa yega na fondo pa nan por cubri nan gastonan di operacion.

Mester remarca cu e dos medidanan aki caba ta afecta Pueblo grandemente ya cu mester paga tanto belasting pero esnan cu mester haya placa bek di belasting no ta haye. E medida riba e fundacionnan tambe ta hopi duro ya cu tur cos a bira mas caro y nan mester tene e fundacion na bida cu hopi menos placa pa luna. Por ehempel, tin fundacion cu tabata recibi 8000 florin pa luna y awor ta recibi solamente 2000 florin pa haci tur cos. Esaki ta pone un precion enorme riba esnan cu mester maneha e fundacion y e calidad di e servicio cu mester wordo ofreci na e cliente ta bira menos. Di e manera aki sigur esnan mas vulnerabel den nos comunidad ta wordo afecta grandemente.

Y ainda falta, ya cu Gabinete Eman promer cu 1 di februari 2015 ainda mester presenta un plan pa mustra con e otro 22 medidanan lo wordo implementa. E ora ey numa Pueblo lo haya sa con nan calidad di bida y nan cartera ta keda afecta pa e maneho descabeya di e gobierno aki. Si Gabinete Eman no a haci deshaci cu fondo publico den cosnan no necesario, awe nos Pais no mester a wordo castiga di e manera aki.

21 januari 2015

Expresionnan haci den e articulo aki no necesariamente ta refleha opinion di ArenaPoliti.co