Partido POR, e Plataforma Forza Nobo, kier introduci via di modernizacion di nos leynan, mas proteccion huridico pa nos ciudadanonan contra decisionnan di gobierno. 

Esey ta palabranan di Andin Bikker, den rueda di prensa. El a bisa esaki pasobra POR a ripara cu ora un gobierno tuma un decision, por ehemplo cosnan cu ta biba den pueblo, entre otro ora cu un hende kier opera den exterior AZV ta nenga; of un persona ta pidi un bowvergunning pero e no ta haje, lunas ta pasa, y mas cu 500 bowvergunning aworaki ta den proceso te ainda strobando e desaroyo economico di nos Isla.

Bikker a sigui bisa: “Asina ey cada bez cu haci un peticion na gobierno, bo no ta haye. Y si bo haya un decision negativo, bo no tin oportunidad pa bay apela of si bo apela mes bo ta haya un decision lihe cu bo no tin un solucion satisfactorio pa bo problema”. Andin Bikker a duna di conoce cu aworaki na Hulanda, si den tanto siman gobierno no contesta bo peticion hasta nan ta core risico di haya un boet. Na Aruba bo ta haci peticion pa vergunning nan ta pasa lunas y tin biaha añas, pasobra nan sa nan derecho pero bo ta sigui warda, warda, y mas warda.

El a splica tambe cu tin un concepto di ley pa loke ta trata ordenanza riba apelacion administrativo, pero pa un of otro motibo, e gobierno actual no kier introduci esaki pa caba. Esaki ta di lamenta pasobra na final di dia por ehemplo, si bo ta un persona cu ta sufriendo di un malesa y bo kier bay den exterior AZV ta nengabo esaki, of no ta contesta diligentemente riba bo peticion. E ora ey bo recursonan huridico ta salibo hopi caro, pasobra lanta un caso den Corte ta costabo miles di florin mientras cu e ordenanza administrativo ta uno cu bo por jega na dje, relativamente facil pa un decision efectivo, pa bo situacion Bikker a splica. E ta kere cu esaki ta netamente un di e motibonan pakico POR ta bogando pa introduci e Academia di Ley. Awor aki el a haya peticion di diferente persona caba y cu e Academia di Ley por tin diferente persona cu ta educa nan mes den e tecnica di traha of formula leynan, pa asina aki nos por moderniza nos leynan mas pronto posible, entre otro riba e proteccion pa nos ciudadanonan ora nan ta confronta cu un decision negativo di gobierno, y cu nan no ta haya un decision na e tempo premira cu gobierno por tuma un decision riba dje, segun Andin Bikker. 

Expresionnan haci den e articulo aki no necesariamente ta refleha opinion di ArenaPoliti.co