Prome Minister Mike Eman a keda hopi impresiona durante su bishita na e instalacionnan na Balashi cu ta produci e cerbes di e mesun nomber, hunto cu diferente otro productonan di bebe. Sr. Eman a haya un recorido di e planta cu tin un sistema automatisa cu a keda introduci recientemente, ademas a mira con bentahoso e 400 panelnan solar ta.

Durante e bishita aki Prome Minister Eman a haya un recorido di un delegacion di e compania consistiendo di: Ingmar Ramharakh, Quality Safety and Environmental Coordinator; Wendell Bennett, Managing Director; Kenneth Bikker, Financial Director y Nicole Martina, Sales Manager. Durante e recorido tambe a cera conoci cu Klaus Eckert- Director tecnico y Patrick Melchiors, coordinador di Marketing.

"Impresionante. Hopi impresiona mi a keda cu e operacion di Balashi. Di pafo bo ta mir'e grandi, pero loke ta wordo haci paden ta mas grandi ainda y mas sofistica di loke un hende por pensa. Esey ta un motibo pa ta orguyoso cu nos tin un cerbes cu ta wordo produci na Aruba."

E mandatario a haya un splicacion amplio di tur e controlnan cu ta wordo haci pa sigura un cerbez di calidad haltisimo cu ta wordo exporta tambe. "Esaki ta duna nos un desaroyo economico adicional," e mandatario a comenta na final di su bishita. E ta haya e proceso aki un parti di diversificacion economico cu Gobierno ta pusha p'e pa cual lo sigui sostene e negoshinan cu ta haci esaki, ya cu nan ta percura pa divisas, crea empleo y estimulo di e economia.

Tambe a splica Prome Minister Eman cu propietarionan a inverti sumanan basta grandi pa automatisa e proceso di produccion y emboteyamento di cerbes y diferente tipo di refresco cu nan ta pone riba mercado. Loke ta admirabel ta cu un cantidad grandi di persona local ta hunga un rol prominente den henter e produccion y tambe den e laboratorio unda cu diferente tipo di control ta tuma luga "pa sigura calidad cu ta algo cu famia de Veer por ta hopi orguyoso di dje".

Loke ta importante pa e mandatario ta pa mira cu locual ta wordo produci na e fabrica, ta crea un cantidad grandi di cupo di trabou. "Bo ta mira hende den diferente proceso di educacion na diferente nivel ta haya chens pa forma nan carera den e fabrica aki. Si tin hende ainda tin duda di loke nos mes por na Aruba, anto cana den e planta di Balashi y keda convenci cu ta hopi ainda ta locual nos por haci na Aruba." Ademas di e controlnan local, e diferente marcanan cu ta bini for di exterior ta wordo controla tambe door di e fabrica madre. Cada bes ta haya confirmacion di con e produccion y proceso ta na Aruba, garantisa door di e fabrica na Balashi.

Pa Gobierno di Aruba cu ta promove energia alternativa, ta un orguyo di mira cu e fabrica di Balashi tambe a tuma e rumbo aki. "Nan ta un di e promenan cu a haci un inversion hopi grandi, unda a instala e maximo posibel di panelnan solar cu ta produci 100 KW di coriente. Nos ta contento cu Balashi a duna e bon ehempel riba e tereno aki," e mandatario a bisa Wendell Bennett, Managing Director di Balashi. Eman a expresa cu esaki ta un confirmacion mas cu ta posibel pa tuma e rumbo di energia alternativo. Balashi a demostra di tin un bon fabrica cu bon productonan y un cantidad di Arubiano funcionando. 

Expresionnan haci den e articulo aki no necesariamente ta refleha opinion di ArenaPoliti.co