Den nos pais nos ta asumi cu tur hende ta igual pa ley. E voto di un doño di un compania grandi tin e mes un balor cu esun di un empleado di e compania. Nos ta biba cu e creencia firme cu tur hende, independiente di nan sexo, religion, nomber, nivel di entrada of color politico, tin e mes un derecho y obligacion cu ley ta fiha. Nos ta asumi cu e forma cu dos persona cu haya nan mes envolvi den e mes un tipo di accidente, ta wordo trata di e mes un forma y ta carga e mes un consecuencia cu ley y reglanan ta prescribi. Ta asina nos kier pa cos ta na Aruba. Ta esey ta e pais cu nos kier. Ley pa un. Ley pa tur. Ora den cualkier situacion nos haya e minimo impresion cu cosnan no ta bay asina, ki ora nos wak cu algun hende ta haya un trato diferente, cu rason henter pueblo ta puntra: unda e regla di ley pa un y ley pa tur a keda?

ESNAN CU PREVILEGIO
Den tur situacion normal no lo tabata necesario pa ni puntra si tur cos a bay normal den e caso di accidente di e parlamentario di MEP y ex-polis Bessaril. Of si e tabata tin culpa of no. Den tur caso di accidente authoridadnan tin regla y proceduranan standard pa aplica. Nos ta confia den nan pa aplica esakinan igual den tur caso. No tin un set di regla pa algun y otro set di regla pa e resto di nos. Den e caso aki sinembargo, henter pueblo ta haci un cantidad di pregunta en busca di e contesta si di berdad ley ta conta pa un y tur. E apariencia di un trato special of previligio pa e ex-polis y miembro di parlamento di MEP aki ta obvio. Tin un cantidad di caso cu hende cu bandona e luga di un accidente, ta wordo busca na cas, ta wordo poni den boei y hiba warda di polis mey anochi. Pa henter pueblo e regla ta conta cu si bo hayabo den un accidente, bo mester keda na e lugar te ora polis yega y haci su trabou. Pasobra polis mester haya tur informacion, haci tur su envestigacion (incluso test di alcohol) pa determina kico a pasa, con ela pasa y ken tin culpa. Anto mester haci e envestigacion cu tur hende envolvi presente. Ta pesey niun hende por bandona e luga di accidente. Ta pesey polis ta bay busca hende na nan cas si nan bay di elugar di accidente. E pregunta ta pakico den e caso aki e ex-polis y actual miembro di parlamento di MEP, si por a bandona e luga di accidente, bay cas y bay warda di polis dia despues ora ela haya ta bon? Esey ta conta pa tur hende? Tur hende por bandona e lugar di accidente y bay polis si y ora e dicidi? Kico ta e regla cu ta conta pa un y tur? O mester conclui cu tin leynan cu ta conta pa nos tur, pero tin algun hende cu tin e previlegio pa no tene nan mes na e leynan aki?

E reaccion di e lider di MEP y e arrogancia cu cual e ex-polis y actual miembro di MEP ta comporta for di momento cu a haya e carta di Ministerio Publico, ta demostra un biaha mas cu integrantenan di MEP no ta tin e sentido di igualdad basico (pa ley) cu resto di pueblo tin. E caso aki ta demostra cu integrantenan di MEP no a siña of a cambia nan forma di pensa y comporta, desde cu nan a usa miyonnan di florin di fondonan publico pa enrikese "friends and family", pensando cu nan tin e derecho pa haci'e. E ta nifica cu e MEP cu a viola leynan di nos pais y e principionan di igualdad, transparencia y resonsabilidad pa nos pais, manera a wordo poni bon cla den entre otro e raport di WODC, ta e mes un MEP di awe. Pa MEP leynan no ta conta pa un y tur. Pa MEP loke ta conta ta: "Hanco pa MEP. Smal pa resto di pueblo". Loke MEP no ta siña compronde ta cu esey no ta e pais cu resto di nos na Aruba kier.

Expresionnan haci den e articulo aki no necesariamente ta refleha opinion di ArenaPoliti.co