E forsa y capacidad di economia ta determina cuanto placa nos ta gana como pais, cuanto hende tin trabou, con nos ta biba y cuanto servicio y beneficio social y economico nos tin? Echonan ta papia pa nan mes. Cifranan di Banco Central y CFT mes ta mustra cu economia di Aruba a cuminsa cay na 2003 caba. Leu prome cu Valero a sera su porta. Leu prome cu e crisis financiero mas grandi den un ciglo. E cifranan ta mustra cu entre 2003 y 2006 economia di Aruba a cay cu 2.4%. Entre 2007 y 2008 ela bolbe cay cu 1.75 %. Entre 2008 y 2009 ela cay cu 11.2%. Esaki ta e caida mas grandi den historia di nos pais. E ta e caida mas grandi cu cualkier otro pais di mundo den un periodo asina cortico. Tur esaki a sosode bou di gobierno di MEP. E consecuencianan di e caida economico aki tabata devastador pa henter nos pais. Trahadornan y nan famia a sufri mas cu tur. Companianan a sera y desempleo a subi te yega 12%. Costo di bida a subi den periodo di gobernacion di MEP cu 25% y prijs di awa y coriente a subi cu 250%. Barionan y centronan di ciudad a bira ruinanan. Pensionadonan tabata desampara. Asina mes MEP a tribi di bisa cu nan a goberna bon! Obviamente pa MEP cos a bay bon. Pa resto di pueblo no!

2009-2015
Awe, despues cu economia a drecha y a subi di -11% (negativo) pa 3% positivo den cuatro aña y desempleo a cay di 12% te 6.7%, por busca splicacion pa haya sa kico a haci cu cos a cambia asina drastico den asina poco tempo. Por wak kico gobiernonan a haci of keda sin haci cu a daña of drecha economia; cu a pone companianan sera of pa nan crea mas cupo di trabao. Tur splicacion ta mustra cu e diferencia entre e periodo di 2001-2009 y e periodo 2009-2015 ta e gobierno cu Aruba tabata tin. Bou di gobierno di MEP (2001-2009) economia di Aruba a cay y sigui cay. Den e periodo aki Aruba a perde mas cupo di trabou cu for di 1985 ora e refeneria a sera pa prome biaha. Den e mes un perido aki gobierno di MEP a corta beneficionan pa trahadornan y nan famia, a stroba companianan pa funciona, a laga costo di bida subi cu 25% y prijs di coriente a subi cu 250%. Contrario na esaki, den e periodo di 2009-2015 ( gobierno di AVP), economia a crece cu 14%, a crea cuponan di trabou cu a pone desempleo baha di 12 pa 7%. Forsa di compra a subi, pensionadonan a haya mas placa, prijs di awa y coriente a baha cu 20 y 15%. E echonan concreto ta mustra cu gobierno di AVP a maneha nos pais miho. Awe, hasta bou di e situacion dificil den mundo y limitacionnan financiero na Aruba, nos economia ta sigui crece y crea mas cupo di trabou. Fondonan social ta bolbe bek na nan forsa rekeri. Perspectiva pa futuro ta miho. Pueblo por huzga pa su mes cu Aruba ta miho bou di gobierno di AVP.

Expresionnan haci den e articulo aki no necesariamente ta refleha opinion di ArenaPoliti.co