Desde cu partido AVP a asumi gobernacion na final di 2009, tur aña y pa 5 aña largo nan a manipula mente di pueblo cu nan ta e partido cu a percura pa un crecemento substancial di nos economia. Sin duda cu un crecemento economico ta trece cune un aumento substancial di entradanan pa gobierno. Sinembargo cifranan oficial di Banco Central ta mustra cu esaki no ta e caso. Asina nos por mira con siman pasa Banco Central a emiti e cifranan di e entradanan total di gobierno pa loke ta aña 2014. Aki nos por mira con na 2014 e entradanan total di gobierno a cay substancialmente cu 29.3 miyon florin y esaki compara cu e entradanan di 2013 (mira tabel adhunto). Y si mira bon for di 2009 te cu 2014 e entradanan total di gobierno a keda na e mesun nivel, pues ni padilanti ni patras! Pregunta ta, ta ki clase di modelo economico Gabinete Eman ta usa cu ta dunando frutanan amargo y miserabel pa caha di gobierno?

                

Sinembargo locual ta mas remarcabel ainda ta cu durante tratamento di e presupuesto adapta di 2014 na December ultimo, e 13 parlamentarionan di AVP a vota ciegamente na fabor di e presupuesto aki caminda tabata ser premira cu e entradanan total di gobierno pa aña 2014 lo ta 1133 miyon florin (mira e otro tabel). Pero awor cu e cifranan oficial di 2014 di Banco Central ta conoci y cu ta mustra cu gobierno realmente a haya solamente 1113.6 miyon florin na entrada, ta con Gabinete Mike Eman y su 13 parlamentarionan ta bay hustifica e 19.4 miyon florin MENOS na entrada den 2014? Di unda nan lo saca e suma extra aki y p’asina cumpli cu locual nan mes  a vota pe na december ultimo?

Cu esaki ta demostra un biaha mas cu e supuesto profesornan den AVP no tin ningun nocion di finansa publico y ta muestra di nan incapacidad pa sigui dirigi destino di e pais aki.

Expresionnan haci den e articulo aki no necesariamente ta refleha opinion di ArenaPoliti.co