Prome Minister Eman: Aruba a demostra cu soñonan si por bira realidad
Prome Minister Eman na firmamento acuerdo pa Sunrise Solar Park
ORANJESTAD – Momentonan manera esaki ta duna nos e prueba cu soñonan por bira realidad,” esaki ta loke Prome Minister Mike Eman a expresa na Tierra del Sol, na momento cu WEB Aruba NV a firma un acuerdo cu e compania ISOTRON, constructor di Sunrise Solar Park na Seroe Colorado. Den su piek e parke aki ta produci 6 MW di coriente.
“Ora cu nos a cuminsa soña riba e dia cu Aruba ta totalmente sostenibel den area di energia, e tabata mustra asina leu, pasobra na e momentonan ey nos tabatin cero capacidad di energia renovabel na Aruba,” Eman a expresa.
El a conta con Aruba paso a paso a cuminsa adkiri conocemento riba e tereno di energia renovabel, asercando nan partnernan WEB y ELMAR pa discuti e caminda pa cana. A yega na e conclusion cu mescos cu Aruba a proba cu tur hende ta robes ora cu a pensa cu no por haci nada pa turismo mirando cu ta nos ta un isla chikito y seco, lo demostra su mes riba tereno di energia renovabel. “Aunke nos ta limita den tamaño y den e mineralnan den nos subsuelo te cu awor, nos a demostra cu nos por tin soñonan grandi y metanan importante pa nos pueblo y nos isla.” El a sigui conta con cu persistencia, di tin e capacidad pa inspira creatividad, conocemento y persistencia di nos comunidad a logra construi un di e industrianan di turismo mas fuerte den Caribe, habri e refineria cu a cera tres biaha, establece sectornan economico unda cu e compromiso ta pa comparti e prosperidad cu pueblo. Esey a haci cu Aruba tin un di e clasenan medio di mas fuerte den Caribe y Latino America.
Pa mantene e vision di un pais cu ta comparti e crecemento economico, cu ta inspira un bida di 5 strea den tur area, ta importante pa sa con pa atende cu e recursonan. Un gran parti di Aruba su recursonan a wordo gasta den produccion di energia, e.o. pago pa cumpra e fuel oil cu mester den e produccion. Tur esaki mientras cu Aruba ta bendiciona cu abundancia di solo y biento fuerte. “Ora cu nos Creador tabata trahando, el a duna nos un isla seco, pero el a duna nos solo y biento na abundancia pa converti esaki na energia, prosperidad y bienestar general pa nos sociedad. Ta keda na nos pa pensa, refleha y uza nos conocemento pa converti e rayonan di solo den energia,” Eman a bisa. Aruba a logra haci uzo di e regalonan aki pa traha y logra cu e isla ta totalmente sostenibel den energia pa 2020, y uza e recursonan liber pa crea prosperidad pa e pueblo, cu ta tarifanan mas abou di awa y coriente, y inversion den futuro di e muchanan. P’esey, el a bisa, tecnologia ta importante y a gradici e socionan nobo di Spaña, cu a trece inversion y tecnologia nobo pa yuda Aruba.
Tambe e mandatario a gradici partnernan manera Carbon War Room, Rocky Mountain Foundation, WEB, ELMAR, TNO, SETAR, Clinton Foundation, cu a contribui y sosten Aruba den su meta pa crea un isla sostenibel energeticamente.
Expresionnan haci den e articulo aki no necesariamente ta refleha opinion di ArenaPoliti.co