Tambe un chens grandi pa hobennan adkiri conocemento    

ORANJESTAD – Como hoben cu ta kere den innovacion y tambe como un ciudadano Arubiano cu kier aporta na progreso di su pais, Clayton Croes tabata presente na e ceremonia di Spantenbier di proyecto ‘Smart Community’ na Kibaima. Aunke e tabata conoce e proyecto caba, el a keda gratamente sorprendi pa e beneficionan multiple cu e ta y ta bay representa pa Pais Aruba. “E ta un tremendo iniciativa. Nos ta hopi contento di wak con ‘Smart Community’ ta bayendo y progresando hopi bon. Di mesun manera scucha con e ta bay finalisa y kico ta e idea su tras,” Croes a bisa.

Croes ta felicita TNO Caribbean, FCCA, Utilities Aruba N.V., Setar Aruba N.V. y WEB Aruba N.V. como miembronan di un cooperacion grandisimo pa trece un bunita proyecto cu ta profila Aruba su vision di sostenibilidad total na aña 2020. E politico hoben a splica di e concepto di ‘Smart Community’ como un laboratorio bibo caminda ta combina e diferente tecnologia pa asina por aplica, mishi y midi e efecto di material di construccion, tecnica y aparatonan innovativo den bida diario. Asina ta compara e diferencia entre un cas convencional y un cas cu ta 100% sostenibel. Croes: “Ta mustra en berdad e tecnologianan tey, nan ta importante y ta traha den practica tambe.”

E politico profilando riba lista di Partido di Pueblo Arubano AVP ta wak Smart Community como un oportunidad importante pa nos comunidad, pero specialmente pa nos hobennan ripara cu e opcionnan sostenibel t’ey ora di traha un cas. “Cu bo por inverti y biba mas consciente di medio ambiente; cu e vision cu Gabinete Mike Eman ta hibando ultimo 8 aña ta realistico y bunita.”

Adicionalmente, e ta representa un chens grandi na nivel educativo. Ya caba TNO Caribbean tin 20 ingeniero Arubiano trahando den e proyecto aki y otronan. Nan ta adkiriendo un cantidad enorme di conocemento y experiencia cu por bay comparti cu otro hoben y profesional na Aruba. Minister ing. Mike de Meza tambe a haci peticion na e stakeholders di ‘Smart Community’ pa permiti studiantenan di scolnan pa bishita e proyecto.

Clayton Croes ta combenci, cu dor di biba e experiencia, di wak e trabounan moderno di cerca, e por sirbi como inspiracion pa un estudio den sector di innovacion. Mas leu den bida, ora cu e hobennan ta yega na momento y ta dispuesto pa traha nan mesun cas, nan sa caba cu e opcionnan t’ey y en berdad ta posibel pa tin un cas cu ta mas sostenibel.

Pesey Croes ta apoya e vision di sostenibilidad, pero tambe e vision di desaroyo di un industria local basa riba conocemento cu partido AVP ta carga ta trahando riba dje pa futuro prospero na Aruba. 

Expresionnan haci den e articulo aki no necesariamente ta refleha opinion di ArenaPoliti.co