Siman pasa Minister di Finanzas, Angel Bermudez a bolbe bek di un biahe relampago cu e la realisa pa Paris, caminda cu e la atende e asina yama “Peer Group Review” cu ta un actividad anual di Organisacion di Paisnan den Desaroyo (OECD) cu ta encarga di monitor e cumplimento di e reglanan implementa pa e organisacion aki respecto labamento di placa y financiamentonan terorista.

Aruba ta forma parti di OECD como pais den Reino, pues e delegacion di nos isla a atende e reunion anual aki hunto cu un grupo grandi di aproximadamente 30 pais cu tambe tabata presente pa discuti riba cada un di e rapportnan di e paisnan respectivo. “Cada pais a haya varios pregunta y cada pais mester contesta esakinan pa haya un cualificacion final, pues e 'Rating' y mi tin cu bisa cu nos como Aruba a sali basta positivo afo. E rating tentativo cu nos a haya tabata esun casi mas halto di e grupo”, Minister Bermudez a informa.

Segun e informacion di mandatario di finanzas, e resultado aki no ta definitivo ainda pues e despues cu e rapport wordo discuti den e “Peer Review Group” e lo wordo formalisa na Maart den e “Global Forum” na Paris caminda cu e resultadonan definitivo tambe lo wordo publica. Minister Bermudez ta contento cu e resultado ya cu esaki ta confirma cu Aruba ta riba e bon caminda pa loke ta trata e topico aki; e intercambio di informacion caminda cu tanto Banco Central y tambe nos Departamento di Impuesto ta envolvi ora cu nan haya un peticion di paisnan den exterior pa intercambia cierto informacionnan cu ta relevante den e combatimento di labamento di placa y financiamento di acto nan terorista.

E mandatario ta splica tambe cu e hecho cu nos ley nan di impuesto ta basta anticua ainda tabata tin su influencia, sin embargo den cuadro di esey diferente articulonan a wordo modernisa pa asina nos por cumpli cu e exigencianan manera cu nan a wordo stipula pa OECD. “Esey ta un di e partinan cu a wordo investiga cerca nos, si berdaderamente e trabou legislativo a wordo haci y esey a wordo haci te cu nos a cumpli cun’e y na mes momento tambe con lihe nos ta cumpli cu e peticionnan di exterior y con lihe nos ta contesta nan”, e mandatario a splica.

Finalmente Minister Bermudez a indica cu e enfoke principal y motibo di e “review” aki ta pa test con cada pais ta cumpli cu e reglanan, si nan ta adapta den  legislacion di cada pais y si nan ta wordo ehecuta manera debe ser. “Nos lo keda pendiente pa e cualificacion definitivo na Maart, pero manera mi a bisa anteriormente nos a sali cu un bunita resultado preliminar for di e review aki y nos ta hopi satisfecho cu esey”, e mandatario e expresa.

Expresionnan haci den e articulo aki no necesariamente ta refleha opinion di ArenaPoliti.co