Den e promer simannan di februari lider di fraccion di AVP claramente bou instruccion di Gabinete Eman a ehecuta un ola di manipulacion pa medio di diferente comunicado culpando oposicion y pintando CFT como un monster den henter e desaster financiero. Tawata obvio cu e intencion tawata pa laba man di e desaster financiero causa pa su propio gobierno. Loke lider di fraccion di AVP mester corda ta cu mas biaha e punta dede riba nos, tin 3 ta mustra den su direccion! Den ultimo añanan no ta solamente uno pero diferente instancia internacional manera Standard & Poors, Fitch, IMF y por ultimo CFT a indica cu nos situacion financiero ta uno penoso y cu e maneho actual no ta na fabor di futuro di nos pais. Remarcabel ta e hecho cu e ola di manipulacion ehecuta pa medio di diferente comunicado tawata un accion premedita simplemente pasobra nan tawata sa cu CFT lo a bai bin cu un campaña di mercadeo y sera conoci cu comunidad di Aruba. Parti di e mercadeo aki tawata un charla teni na Universidad di Aruba unda cu e organo di supervision a duna su elaboracion riba e realidad financiero di nos pais.

Den e charla aki CFT a elabora y pone enfasis riba hopi berdad amargo. Un di e puntonan cu a resalta ta e hecho cu gobierno di Aruba ta gastando mas di loke e ta ricibi cual por wordo confirma tambe cu e deficitnan registra den e ultimo añanan (averahe deficit pa aña ta 8.4%). E mesun deficitnan a contribui tambe na un debe nacional cu a surpasa tur norma internacional (mester ta entre 35-40% pero a yega 80% caba). Otro berdad cu a enfatisa riba dje ta cu gobierno no sigui por fia placa pa gastonan coriente y mester cuminsa trece ordo. Ademas di esaki CFT a acentua un biaha mas cu e plannan existente di Gabinete Eman pa logra un surplus 2018 no ta suficiente y ta pa es motibo a indica na gobierno cu mester pensa riba introduccion di un impuesto di solidaridad indirecto. E organo a enfatisa si cu e la evalua e plan riba mesa pero cu e no ta tuma ningun decision pasobra esaki ta den man di gobierno. Ta pesei CFT a bisa den e charla tambe cu nan rol ta supervisea y evalua si gobierno ta dunando contenido na kiko realmente ta goberna door di tuma decisionnan pa logra nan propio metanan.

Tawata bisto si cu den e afan di AVP pa trata entre otro di pinta CFT como e malo di historia a termina na expresa e MIEDO grandi cu nan tin pa e berdad financiero sali na cla. Obviamente E MIEDO tawatin di haber cu pueblo lo haya sa cu ta e gobierno aki a desgracia nos pais financieramente y pone cu te na aña 2034 nos lo tin un situacion financiero sostenibel atrobe. Pero AVP den su intento no a logra stroba CFT di informa pueblo cada un detaye di e situacion y retonan cu nos pais lo tini su dilanti. Ta di lamenta si cu e situacion a bira uno asina caotico y cu ta premira cu e medidanan actual no ta suficiente. Apesar di e empeño di parti AVP pa tapa e situacion real e organo di supervision CFT a desenmascara fraccion di AVP y Gabinete Eman!

Expresionnan haci den e articulo aki no necesariamente ta refleha opinion di ArenaPoliti.co