NOS KIER ALTERNATIVA, NO MEDIDA 

SANTA CRUZ – Lider di MEP Evelyn Wever-Croes durante e programa semanal “ARUBA MERECE MIHOR” a splica cu nan como oposicion ta bai hiba otro forma di oposicion. Naturalmente lo keda critico riba e gobierno actual, y lo sigi denuncia tur e abusonan di e gobierno. Sin embargo memey di tur e turbulencianan cu e medidanan ta ocasiona, MEP kier brinda e pueblo alternativa. Pa asina cada cuidadano por sobrebibi tur e tempestad cu ta biniendo.

“Ta obvio cu e gobierno aki ta bin cu un lista di medida, y pesey nos mester busca alternativa. E UNICO alternativa na e momento aki ta re-apertura di e refineria. Dicon?

1. Re-apertura di e refineria lo crea empleo, especialmente riba nivelnan mas halto, y si nos kier desaroya un ‘kennis economie’ nos mester por brinda e cuponan di empleo ey tambe; hotelnan no por brinda esaki;
2. Re-apertura di refineria ta garantisa cu nos moneda no ta core peliger mas, y lo fortifica reserva di nos devisas; un hotel no por hasi esaki;
3. Re-apertura di refineria ta pone nos economia crese cu 12%, ningun hotel por hasi esaki.
4. Cresemento di nos economia cu 12% ta pone cu nos no mester di e MEDIDA nan mas. Claro cu e prioridadnan di gobierno mester wordo cambia, mester bai bek na 7 minister en bes di 9, mester stop cu tanto biahamento, fiestamento, gasto di propaganda, etc. Pero en todo caso, lo no mester mas di un solidariteitsbelasting!
5. Re-apertura di refineria ta diversifica nos economía, y ta kita e peso cu tin actualmente riba e sector turístico. Tursimo so no por sigi carga nos economía.

Pesey nos kier pa para e desmantelacion awor, y permiti e negosacionnan c uta andando na e momento aki, concretisa y realisa. Si nos desmantela awor, nos tin wel di lubida.
Nos kier ALTERNATIVA, no MEDIDA, kiko abo kier?

Expresionnan haci den e articulo aki no necesariamente ta refleha opinion di ArenaPoliti.co