Apoyo di Gobierno pa inversion stranhero y siguridad di carga ta elementonan clave 

ORANJESTAD/PANAMA CITY – Ademas di representa Reino Hulandes den Cumbre de las Americas y lidera e mision comercial riba tereno maritimo y di logistica, Prome Minister Mike Eman a tuma oportunidad durante su presencia na Panama pa atende cu e interesnan comercial di nos pais. Den transcurso di dialuna atardi, Minister President den compania di Embahador di Reino Hulandes na Panama Wiebe de Boer a realisa un bishita na e Zona Liber di Colón caminda a reuni cu distribuidornan grandi di productonan pa bisti di marcanan renombra.

E meta di e encuentro aki tabata pa promove nos isla no solamente como un hub pa distribucion di mercancia den henter Caribe y Suramerica, pero tambe pa inverti den nan presencia comercial cu posibel apertura di tiendanan flagship. E empresarionan aki, cu ya conoce nos isla y su mercado, tabata hopi complace di tabatin e oportunidad di topa personalmente cu Premier Eman y di wak cu e Gobierno di Aruba ta stimula activamente e desaroyo economico resaltando e atractivo comercial di nos nacion.

Minister President Eman a topa specificamente cu Juan Carlos de Diego, General Manager di Express Distributors; Denis Abadi, Director di International Apparel Corporation S.A., distribuidor di Levis y Dockers pa Centroamerica; y Mijael Mogilevsky, president di ESMO International dedica na e importacion y exportacion di marca US Polo pa henter Latinoamerica y Caribe. Tur ya caba tin relacionnan comercial cu comerciantenan local pa cierto di e marcanan, pero tin hopi mas ainda cu por haci nan entrada na Aruba.

Premier Eman a enfatisa cu e intencion ta pa mustra e empresarionanan cu Aruba ta ofrece e condicionnan ideal pa desaroyo di inversion den particularmente tiendanan flagship. Ademas di stabilidad politico y economico, Aruba a caba di renoba su Caya Principal y centro di ciudad cu e obhetivo di atrae marcanan renombra y mercancia na prijsnan accesibel tanto pa local como turista. “Nos kier stimula y atrae nan pa bin habri tienda na Aruba. Sigur nan lo yuda den duna nos caya grandi un realce,” e mandatario a indica.

E inversion aki por ta directo of pa medio di asociacion cu comerciantenan local. Den ambos caso, e ta traduci den creacion di cupo di trabou ademas di aumento den volumen di actividad economico pa loke ta trata sector di importacion, bancario y fiscal. Entre e comerciantenan cu Prome Minister Mike Eman a papia cune tin cu ta bishitando nos isla proximo siman mes pa sinta cu algun cliente y wak e recursonan pa un sociedad manera ta e caso di Mogilevsky, mientras cu den e caso di Abadi, el a expresa su determinacion pa establece pronto. Ta algo cu e tabata contempla caba y e muestra di apoyo di parti di Gobierno a caba di convence nan. Adicionalmente, e siguridad pa transporte di carga ta hunga un papel importante. “E interesante di Aruba ta cu tin standard hopi halto di maneho di carga y e mas importante ta pa e yega sigur, inacto y bon; den e sentido ey tin un oportunidad cu ta interesa nos,” asina De Diego a comenta.

Expresionnan haci den e articulo aki no necesariamente ta refleha opinion di ArenaPoliti.co