Dia 16 di januari 2016 parlamentario (y abogado) Andin Bikker, hunto cu abogado Delo Gomez, a presenta dilanti jueznan di Raad van State (Hulanda) pa trata un caso pa logra cu ciudadanonan cu nacionalidad Hulandes, bibando na Aruba, Corsou y Sint Maarten, haya derecho di voto pa eleccion parlamentario di Hulanda (Tweede Kamerverkiezingen).

Den un entrevista cu ArenaPoliti.co sr. Bikker a elabora riba e caso, argumento y meta tras di e intento pa logra e derecho di voto en cuestion.


Influencia
Kisas hopi Arubiano no ta interesa den e politica interno di Hulanda, pero e meta di sr. Bikker mester wordo busca mas den direccion di e influencia cu gobierno Hulandes tin ariba Aruba, y e efecto cu e derecho di voto en cuestion por tin riba esaki.

“E ora nan mester scucha’bo y tene debido cuenta cu’bo paso bo ta representa un masa cu por tin influencia riba e resultado di eleccion.”

Parlamentario Bikker tambe a vocifera cu tin partidonan Hulandes cu kier pa e islanan di reino Hulandes sea bira independiente of cambia e structura estatal den un relacion di ‘gemenebest’ . “E partidonan ey no ta kere den reino Hulandes manera cu e ta, pero no cu nan kier cambi’e pa mas cooperacion y/of drech’e. Nan kier, basicamente, e opcion pa nos sali for di e constelacion actual.” Cu derecho di voto, sr. Bikker ta sinti cu Hulanda lo tin mas oido pa e islanan den reino Hulandes. “E ora nan mester scucha’bo y tene debido cuenta cu’bo paso bo ta representa un masa cu por tin influencia riba e resultado di eleccion.” Sr. Bikker ta añadi cu, apesar cu e islanan lo representa entre 2 pa 3 asiento di e 150 asiento total, na Hulanda na mas ocasion gobiernonan a wordo forma a base di un mayoria minimal den cual 2 asiento por haci un diferencia.


Union
“E ta bay tin un dimension di union pa e pueblonan,” sr. Bikker ta bisa relaciona cu e derecho di voto pa Tweede Kamerverkiezingen. Segun Bikker, actualmente no tin electorado riba nivel di reino pa duna atencion na dje. Cu e derecho di voto, e pueblonan di diferente isla lo tin mas atencion pa eleccion di Tweede Kamer, cual sr. Bikker ta wak como un factor cu lo unifica e pueblonan di reino Hulandes. Ademas Bikker tambe ta mustra riba e posibilidad pa ciudadanonan di Aruba, Corsou y Sint Maarten postula nan mes como candidato. E ta compara e aspecto aki cu Merca, caminda representantenan di e diferente estadonan ta representa nan estado dentro di un constelacion federal.

“E ta bay tin un dimension di union pa e pueblonan.”

Parlamento di reino Hulandes
Bayendo mas den detaye riba e caso, sr. Bikker ta elabora riba e argumentonan na fabor di duna Aruba, Corsou y Sint Maarten derecho di voto pa eleccion di Tweede Kamer. Referiendo na un rapport di ‘Commissie Democratisch Deficit’ (Kiezen voor het Koninkrijk), sr. Bikker ta mustra riba e recomendacion pa duna tur ciudadano den reino Hulandes cu nacionalidad Hulandes derecho di voto pa eleccion di Tweede Kamer. Andin Bikker ta expresa di ta di acuerdo cu conclucionnan di e rapport aki, por ehempel riba e punto cu defacto Tweede Kamer ta e ‘Parlamento di reino Hulandes’, considerando cu oficialmente no tin un ‘koninkrijksparlement’. Esaki ta relevante en particularmente pa decretonan y koninklijke besluiten/algemene maatregelen van rijksbestuur cu ta sali for di rijksministerraad (gobierno di reino). Por medio di e decretonan aki, Hulanda por ‘mete’ den e proceso legislativo di Parlamento di Aruba, sin cu e votadonan di Aruba por eherce influencia riba gobierno di reino. Ademas sr. Bikker ta mustra riba e punto cu desde 2012, Tweede Kamer ta e instituto cu ta nombra un formateur ora di forma un gobierno Hulandes. Considerando cu gobierno di reino mastanto ta consisti di ministernan di gobierno Hulandes, por bisa cu eleccion di Tweede Kamer (cu ta resulta den formacion di gobierno Hulandes) ta igual na eleccion pa gobierno di reino. Tur esaki ta forma un argumento democratico fuerte pa hustifica e derecho di voto en cuestion.


Trato desigual
Sr. Bikker tambe ta argumenta cu Aruba, Corsou y Sint Maarten ta hayando un trato desigual cu e islanan BES (Boneiro, Saba y Sint Eustatius). Desde 10 di oktober 2010 e islanan BES a haya derecho di voto pa Tweede Kamerverkiezingen paso, riba papel, nan ta parti integral di Hulanda. Sr. Bikker: “Nan ta bisa riba papel cu BES ta parti integral di Hulanda, pero e realidad huridico ta otro.” Bikker ta menciona cu e islanan tin nan propio moneda, propio sistema financiero, diferente sistema di ley, no ta parti di cierto tratado cu Hulanda ta forma parti di dje y e hecho cu bay for di e islanan pa Hulanda (grenscontrole) no ta mescos cu bay for di un ciudad Hulandes pa un otro ciudad Hulandes. Segun Bikker Hulanda ta haci un distincion entre e mesun ‘paspoorthouders’ (nacionalidad Hulandes) cu e unico diferencia cu nan ta biba na diferente isla den e parti Caribense di reino Hulandes. Sr. Bikker ta considera esaki un “ongeoorloofd onderscheid” pa loke ta trata otorgamento di derecho di voto pa Tweede Kamer.

“Nan ta bisa riba papel cu BES ta parti integral di Hulanda, pero e realidad huridico ta otro.”

Eman/Sevinger (2006)
Sr. Bikker tambe a referi na e caso Eman/Sevinger (2006) den cual corte Europeo a conclui cu e islanan di reino Hulandes no mester tin derecho di voto pa Tweede Kamer (pero si pa parlamento Europeo). Bikker ta argumenta cu e situacion actual no ta mescos cu e situacion na 2006. Asina tin e cambio den structura desde ’10-10-10’ cu e “ongeoorloofd onderscheid” menciona, y tambe e cambio den e maneho di gobierno di Reino pa cu Aruba, Corsou y Sint Maarten.


Geschillenregeling
Sr. Bikker ta spera cu Raad van State dicidi cu esnan cu nacionalidad Hulandes bibando na Aruba, Corsou y Sint Maarten lo haya derecho di voto pa eleccion di Tweede Kamer. Na mesun momento Andin Bikker ta mustra riba e posibilidad cu Raad van State ta reconoce cu e situacion actual no ta corecto, pero ta opta pa un diferente ‘solucion’ (rechtsherstel) cu no ta derecho di voto, por ehempel introduccion di un geschillenregeling riba termino corto. Ta trata di e mesun asunto di geschillenregeling cu pa añanan largo ta wordo discuti entre e paisnan den reino Hulandes, sin cu ela wordo realisa te ainda. Pues e caso aki tambe por resulta den yega mas serca di un geschillenregeling, den cual pa colmo Raad van State mes ta wak un rol pa nan mes aden.


Dia 25 di januari e decision di Raad van State lo ta conoci. E siguiente eleccion di Tweede Kamer lo tuma luga 15 di maart 2017.

Expresionnan haci den e articulo aki no necesariamente ta refleha opinion di ArenaPoliti.co