Hopi conoce sr. Ricardo Croes como e persona principal tras di un movimiento pa legalisa uso di cannabis. Na 2013 sr. Croes a join partido RED y a participa como candidato number dos riba lista, logrando 420 voto. Cu e meta di legalisa uso di cannabis den mente, sr. Croes tambe a lanta un fundacion na aña 2014: I Legalize Aruba (ILA Foundation).
Actualmente sr. Croes ta e siguiente lider di partido RED. ArenaPoliti.co a aserca sr. Croes pa un entrevista pa haya sa mas di tanto su punto di bista como lider, y partido RED.

Den su hogar, sr. Croes ta conta con e y su casa, algun dia pasa, atrobe a bay un entiero di un persona cu a perde e bataya contra cancer. Emociona sr. Croes ta conta cuanto persona ta aserca su persona pa yuda nan haya azeta di cannabis pa yuda cu nan situacion medico. Personanan cu no ta sinti cu e remedinan cu dokternan ta prescribi ta yudando nan. Sr. Croes ta conta cu tin dokternan cu ta manda pashentnan na su cas pa purba haya azeta di cannabis.

E discusion riba uso medicinal di cannabis a cambia hopi durante e ultimo añanan. Na 2013 partido RED tawata para nan so riba e tema aki. Na 2016 nos tin un minister di salud publico cu ta wak potencial den e uso medicinal di cannabis, mientras cu e lider di e partido mas grandi den oposicion ta wak un necesidad pa legalisa uso medicinal di cannabis. Lider di UPP sr. Booshi Wever tambe a confirma na ArenaPoliti.co di no tin obhecion pa legalisa uso medicinal di cannabis.


Medicinal vs. Recreacional
Na mesun momento partido RED ainda ta mustra di ta para nan so pa loke ta trata legalisa uso recreacional di cannabis. ArenaPoliti.co ta puntra sr. Croes tocante e punto di bista di RED riba uso recreacional.

Sr. Croes su argumentacion pa legalisa uso recreacional di cannabis ta ensera e punto di bista cu huma cannabis no ta algo dañino pa salud di hende, y cu no mester separa uso recreacional for di uso medicinal. Su argumentacion pa e puntonan aki por ta compleho pero tambe simpel. Algo cu ta tipifica henter e discusion riba cannabis. Por ehempel, nos por lesa cientos di pagina di investigacionnan scientifico compleho riba e pregunta si cannabis tin beneficionan medicinal, of nos por wak un mucha cu ta haya varios atake epileptico pa dia, a pesar di medicinanan convencional cu ‘side-effects’, reduci su atakenan pa algun pa luna despues di tuma azeta di cannabis.

“If humans react like that in Portugal, if humans react like that in Holland, if humans react like that in Denver, there should be a damn good reason for them not to react like that in Aruba.”

Asina sr. Croes tambe ta varia su argumentacion pa uso di cannabis en general, referiendo na investigacionnan di diferente dokter (Donald Tashkin, Melanie Dreher), pero tambe dunando ehempelnan di e efecto cu legalisacion di cannabis tawata tin na otro pais. Sr. Croes ta conta con na Portugal, Hulanda, Canada y Denver, despues di a legalisa (of tolera) y regula uso di cannabis, a experiencia un efecto contrario na loke hopi hende a spera. Criminalidad, (ab)uso di alcohol y otro droganan, accidentenan pa motibo di core bou influencia di alcohol y humamento di cannabis bou di hobennan tur a baha.
Sr. Croes: “If humans react like that in Portugal, if humans react like that in Holland, if humans react like that in Denver, there should be a damn good reason for them not to react like that in Aruba.”
E ta conta tambe cu den e mesun paisnan e economia a wordo stimula y gobiernonan a haya un extra entrada pa motibo di impuesto riba cannabis. Sr. Croes ta conta con otro pais a usa e entradanan aki pa inverti den enseñansa y husticia. 

Stress
Ricardo Croes ta conta con stress por resulta den problemanan medico mas severo (“psychosomatische ziektes”) y con hende ta bebe pildo pa drumi of calma y ta bay dokter of psicologo pa problema cu stress. Tin biaha dokter ta manda pashent bay cana of recrea pa baha stress. Otro ta bebe nan cerbes despues di trabou pa baha stress. Sr. Croes ta conta cu mientras cana por yuda, y alcohol sigur no ta yuda, cannabis si a prueba di ta yuda tremendamente pa baha stress di hende. “Ami no ta bou di e impresion cu huma un joint pa baha stress di trabou ta algo negativo. Ni tampoco necesariamente mester cay bou di recreacion separa for di medicinal. Pasobra ora mi dokter recomendami un tratamento pa baha stress, ta con mi tin cu conciderele? Un tratamento medico? Of un tratamento di recreacion?”   


THC 
E combersacion ta sigui riba e diferencia den cantidad di e constituyentenan CBD y THC den diferente azeta di cannabis. Ta conoci cu varios investigacion a mustra riba beneficionan di CBD, cual no ta e constituyente di cannabis cu ta haci’bo ‘high’ y p’esey ta mas acepta (por ehempel pa minister Schwengle). Pero sr. Croes ta splica cu, apart di cancer, pa malesanan manera parkinson, alzeimer y depresion, e THC den cannabis, cual ta e constituyente cu ta haci’bo ‘high’, ta loke por yuda y pues THC tambe tin su bentahanan medicinal.

Ricardo Croes: “Pa crea un impresion cu tin un diferencia entre recreacional y medicinal… e ta corecto solamente ora bo mustra cu, cu recreacional nos kiermen cu nos lo kier habri coffeeshops, un hende por drenta, huma un joint pa baha su stress, pa e chill, have a cup of coffee, have a piece of cake… That’s what we mean with recreational.” Y segun sr. Croes esey no mester wordo separa for di uso medicinal, paso e hende cu lo kier huma cannabis pa baha stress y preveni e consecuencianan cu stress por tin pa su salud, ta drenta e mesun coffeeshop.

“Ami no ta bou di e impresion cu huma un joint pa baha stress di trabou ta algo negativo. Ni tampoco necesariamente mester cay bou di recreacion separa for di medicinal.”

Sr. Croes ta duna ehempel di pashentnan cu ta haya atakenan (spasms) continuo cu ta para ora nan huma un tiki cannabis. “That’s smoking as a medicine. Pretending that smoking is not a medicine, that’s a mistake. Pretending that recreational is separate from medicinal is a next mistake.”
E unico separacion entre uso medicinal y uso recreacional cu ta ‘make sense’ pa sr. Croes ta ora ta trata di productonan di cannabis manera un crema of un pomada cu ta wordo hunta pa alivia por ehempel artritis. Pues un uso externo.


Politricks
“E ta fout si nos persisti cu huma un joint ta un drogadiccion. Cu cannabis recreacional ‘is a bad thing if we smoke it, but we agree with medicinal.’ Esey ta politricks. This is playing with the people’s lack of accurate information.”

Ricardo Croes ta sinti cu hopi hende no tin e boluntad pa busca informacion y informa nan mes debidamente riba e tema aki. E no ta referi solamente na politico, pero tambe dokternan. E ta convenci cu si tin boluntad y bon informacion, e partidonan cu ta pro uso medicinal pero contra uso recreacional, lo cambia nan punto di bista.
“Partido RED no ta wak e diferencia asina ey manera otro partidonan kier pretende cu e ta existi pasobra nos ta informa caba. Corda bon, nos ta e prome. Nos a lanta un fundacion y nos a sera contactonan mundial. Nan ta bin awo, bin coy cabay bieu di campaña di tres aña pasa pa nan core cu e cabay ey den campaña. Anos no tin e cabay di campaña ey mas. E ta un tema serca nos, pero no cu e ta, mane nan ta bisa, nos cabay di campaña.”

“E ta fout si nos persisti cu huma un joint ta un drogadiccion.”

Consecuencia social
Sr. Croes tambe ta wak e falta di informacion den comunidad como un factor negativo cu ta resulta den e realidad social cu hopi usado di cannabis ta wordo ‘labeled’ como usado di droga, no ta wordo acepta den cierto grupo y ta mas dificil pa haya trabou paso nan no lo pasa un drugtest. Consecuencianan cu segun sr. Croes ta basa riba falta di informacion, pero cu un usado mester ta consciente di dje. Mescos cu e mester ta consciente cu na Aruba uso di cannabis ta ilegal.


Despues di e entrevista e combersacion a sigui riba veranda dilanti cas di Ricardo Croes. Un SUV cu un chauffeur desconoci pa sr. Croes ta yega y para dilanti di e cas, baha su bentana, ta cuminda sr. Croes y ta puntra si sr. Croes por bis’e unda e por haya azeta di cannabis.
Sr. Croes: “Legalmente, na Aruba? Niun caminda….”


Keda pendiente pa otro temanan cu a wordo papia durante e entrevista. 

Expresionnan haci den e articulo aki no necesariamente ta refleha opinion di ArenaPoliti.co