Perspectiva Independiente without background 001

‘Control real cu un coalicion di mas cu dos partido’ [entrevista]

RaymondHernandez02
Candidato di UPP Raymond Hernandez ta na fabor di un coalicion como proximo gobernacion di Aruba. E politico, tambe Hefe di Servicio di Archivo Nacional Aruba, ta di opinion cu un coalicion, preferiblemente di mas cu dos partido, lo percura pa e control riba gobierno bira uno real. Sr. Hernandez tambe ta considera un coalicion un oportunidad pa haci cambio y reformanan fundamental tanto den politica como den gobernacion. Esaki sr. Hernandez a expresa e.o. den un articulo titula ‘Importancia di un eleccion y e poder di bo voto! Pakico un coalicion?’

ArenaPoliti.co a tuma contacto cu e candidato di UPP pa haci preguntanan bayendo mas den detaye riba e aspecto di un coalicion. Sr. Hernandez ta contesta preguntanan tocante un mayoria absoluto, stabilidad den gobernacion y kico UPP por sigura pueblo di haci den un eventual coalicion.

Mayoria absoluto
ArenaPoliti.co: Segun bo persona, kico ta e desventaha principal pa pueblo ora un (1) partido goberna a base di un mayoria absoluto?

Raymond Hernandez: “Den e cultura Caribense y Latino Americano, a pesar cu esaki ta un caracteristica universal di humanidad, particularmente gobernacion basa riba un mayoria absoluto di un solo partido ta conduci na un sistema totalitario na unda cu ya e minoria su voz no ta importante, ni di esnan cu ta vocifera nan preocupacionnan riba maneho, decisionnan y desaroyonan den un pais. E absolutismo aki ta hiba tambe na un situacion unda cu e checks of balances natural di p.e. un coalicion, no tey, p’asina percura pa como gobernacion y gobernante bo ta keda cu pianan riba tera. Sky is the limit, na momento cu como partido mayoritario bo ta ciega pa poder y ta sinti cu bo ta para riba ley. Aruba a experiencia e absolutismo aki pa e ultimo 16 añanan y sigur el a hiba nos mas leu di cas. Den paisnan cu democracia mas bieu (mas experiencia y madura) a percura pa tin sistemanan di checks and balances in place pa hustamente evita abusonan. Absolutismo por conduci na un nepotismo completo den un pais, na unda cu derecho democratico ta wordo mina mescos cu igualdad entre ciudadanonan. Nos democracia jong na e momentonan aki no ta wordo sirbi cu gobiernonan basa riba mayoria absoluto.”
... gobernacion basa riba un mayoria absoluto di un solo partido ta conduci na un sistema totalitario na unda cu ya e minoria su voz no ta importante…”

Stabilidad 
ArenaPoliti.co: Por lo general, e riesgo cu un gabinete di coalicion cay ta mas grandi compara cu un gabinete basa riba un mayoria absoluto. Si UPP logra forma parti di un coalicion, kico UPP lo haci di su banda pa purba crea y mantene stabilidad den gobernacion? 

Raymond Hernandez: “Pa cuminsa UPP lo no ta bay cu e pensamento di tin e posicion di yabi. Sino ta bay cu e bienestar general y e progreso di e pueblo y pais ta na prome luga. P’esey tambe UPP ta kere cu e metanan y programa di gobernacion mester ta bon fiha. Palabracionnan mester ta concreto riba e puntonan di accion cu tin di tuma luga, pa drecha e situacion di nos pais. UPP incluso lo por bay na ‘gedoog’ un gobierno si ta necesario, basta cu e gobierno cu sinta ta traha na interes di e pueblo. Aruba no ta na momento pa tin wega, ni oportunismo den gobernacion. Y UPP ta priminti tambe, como parti di un coalicion, preferibel di mas cu dos partido, di lo ta habri pa cu pueblo, transparente cu e pueblo, riba desaroyonan den gobernacion.”
Aruba no ta na momento pa tin wega, ni oportunismo den gobernacion.”

UPP den un coalicion    
ArenaPoliti.co: Usualmente e partido mas grandi den un coalicion tin ‘mas di bisa’ pa loke ta trata e maneho di e coalicion, mientras cu e partido(nan) mas chikito den e coalicion lo mester ta mas selectivo den ehecucion di su plan di gobernacion (programa di partido). Cua plan/proposicion di UPP sigur lo mester forma parti di e maneho di un coalicion pa UPP forma parti di un coalicion? 

Raymond Hernandez: “UPP tin un programa na mi aparecer bon elabora. Hopi facetanan di nos problemanan aki na Aruba nos ta acapara den esaki. Naturalmente e partido mas grandi lo kier tin mas input den su programa. UPP tin riba su mes cinco punto principal cu ta di vital importancia pa un cooperacion cu otro partidonan. Esakinan ta Enseñanza, Bon Gobernacion, Husticia y Seguridad, Medio Ambiente, y Integracion.”

Reglanan di Bon Gobernacion y reforma di nos sistema electoral 
“Bon Gobernacion [Good Governance] ta un di e puntonan cu lo mester sosode tanto na nivel di Parlamento y esun di gobierno. Parti di Bon Gobernacion, no ta unicamente e reglanan di bon gobernacion, sino tambe e democratisacion di nos comunidad y tambe nos sistema electoral. Na nivel di Parlamento lo mester traha riba e reforma di nos sistema electoral y representativo, mientras cu na nivel di gobernacion lo mester percura pa bin cu e leynan cu ta necesario pa hiba un bon gobernacion, cu lo contribui na elemina e desigualdad economico y legal, termina corupcion y malgastamento di placa, cu e meta pa saca nos for di e debacle financiero.”
Parti di Bon Gobernacion, no ta unicamente e reglanan di bon gobernacion, sino tambe e democratisacion di nos comunidad y tambe nos sistema electoral.”

Mas aspectonan importante
“E otro aspectonan tambe ta importante. Base di e transformacion di nos comunidad, tanto pa loke ta e sentimento patrio, e norma y balornan di un bon ciudadano y oportunidad di progreso, ta keda nos enseñanza. Esaki ta uno cu mester conoce un transformacion completo, pa nos por salba nos generacionnan pa e siglo 21 cu ya caba ta caminda pa un cuarto siglo.

Otro aspectonan importante cu mester percura pa felecidad di nos pueblo, pa nos ciudadanonan sinti bek e trankilidad di biba riba un isla cu tur hende por hala rosea trankil, sin ta sinti nos ansha pa e desaroyo, hopi biaha negativo, di e ultimo añanan, ta nos Seguridad, Medio Ambiente y Integracion. Nos mester realisa cu nos capacidad di carga no ta crece mas y cu nos mester percura pa e balance entre planeta, hende y probecho (Planet, People & Profit). Nos mester crea e siguridad necesario, cuida nos medio ambiente y percura pa esnan cu scohe pa biba riba e pais aki ta siña biba cu otro den un forma integra. Ta asina so nos por bolbe crea un pais feliz y cu un miho mañan.”
Nos mester crea e siguridad necesario, cuida nos medio ambiente y percura pa esnan cu scohe pa biba riba e pais aki ta siña biba cu otro den un forma integra.”

E prome 100 dia cu UPP den un coalicion  
“Pa UPP ta importante cu den e prome 100 dianan di gobernacion cierto pasonan wordo tuma cu ta concretisa partinan di loke ta e.o. e cinco puntonan aki. Asina riba tereno di Bon Gobernacion lo mester fortifica e ley di transparencia, pa asina gobierno y Parlamento haci mas informacion accesible pa pueblo; percura pa tur luna minister presidente bin duna relato di desaroyonan den Parlamento, mescos cu ministernan mester bin duna cuenta na Parlamento na momento cu nan a haci un biahe di trabou. Pues por medio di ley (consitucionalmente) mester percura pa ministernan duna cuenta.

Riba tereno di enseñansa mi por menciona e aprobacion por medio di ley di enseñanza gratis, cu nos Parlamento te awo a faya den esaki. Tambe cuminsa cu e preparacion pa introduccion di e sistema multi-lengual den nos enseñanza. Riba medio ambiente, particularmente e candela di dump mester paga definitivamente, mientras cu mester pone e planta di procesamento di sushi traha bek. Y pa loke ta cuido di nos medio ambiente mester bin cu e ley ambiental cu ta regula e cuido, mescos destinacion di sitionan como reserva natural. Pa loke ta siguridad den e prome 100 dianan mester pone e helicopter di polis bula bek, mescos cu e radarnan pa cuida nos costa. Tambe bin cu drones cu mester duna un man na Polis pa combati criminalidad y na Warda nos Costa pa combati entrada ilegal na nos costanan.”

Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

[email protected]

 

Advertising:

[email protected]

x

 

Inscribi pa ricibi un resumen semanal di e articulonan mas impactante.