Den e proceso di tratamento di e ley pa duna sosten na gobierno pa loke a wordo firma caba entre gobierno y CITGO/PDVSA y VALERO por mira cu ainda tin hopi duda y inquietudnan cu ta existi rond di e contratonan. UPP a bin ta adverti riba e posicion cu politiconan ta tuma den tur e proceso aki. Nos por mira cu for di seno di parlamento, apesar cu tin ta bisa cu tin sentimentonan mixto, e aprobacion ta mas cu evidente.
Di un banda nos por observa e falta di respet total pa Parlamento, ora cu documentonan no ta wordo duna na disposicion di Parlamentarionan pa nan haci nan trabou. Di otro banda nos por mira un Parlamento cu ta permiti pa nan derechonan wordo trapa y ta recompensa gobierno p’esaki, dor di cueste loke cueste mester coopera cu gobierno pa termina e proceso aki. Si algun siman pasa por a yega na un “consenso” den tratamento di e amienda di partner registra, dicon e Parlamentarionan di oposicion cu a sinta hunto cu lider di fraccion di AVP, no por a yega na un consenso, den forma di negosha, pa haya e documentacionnan y tempo necesario pa studia e materia? No por a percura pa bin cu un consenso pa asina mustra gobierno, cu e tin di respeta Parlamento?
Loke ta importante ta cu na momento cu duna Parlamento e informacionnan aki, pueblo tambe ta haya e oportunidad pa pone su mes na altura di loke ta e contenido di contratonan y di loke e por spere pa e siguiente añanan.

E reunion no solamente tabata parce un campo di bataya, pero alavez un circo politico. E discusion a bay pa gran parti pa wak ken ta bay cu e merito di e apertura di e upgrader. Y esaki djis cu e miras riba e siguiente eleccion otro aña. For di un principio UPP a adverti pa e cos aki, pero ningun hende parce di a of ta preocupa, pero awor nos ta wak cuanto gritamento tin.
Mientras cu pueblo a wordo priminti un refineria completo, awe nos ta papia di un “upgrader”. Nos por tende Parlamentarionan cu concientemente ta bisa cu e crudo ta di un mal calidad y cu e residuonan (afval) lo ta hopi peligroso. Pero toch ta bisa cu e ta contento cu San Nicolas ta bay haya bida atrobe. Pero con ta para cu aspecto ambiental y e limpieza cu no cla ainda, manera asbest cu lo ta riba tereno di refineria? Con ta para cu e fondo ambiental, cu Valero lo pone pa Aruba? Ki assesment tabata tin pa por yega na e suma cu Valero a bay di acuerdo pa deposita den e fondo?

Awe Aruba ta wordo bendi barata cu un multinacional cu practicamente ta mustra di ta bancarota. Mientras cu CITGO mester di un suma di riba 650 miyon dollar pa rehabilita e refineria, parce cu ni 100 miyon dollar nan no por haya ainda for di nan compania madre esta PDVSA. UPP ta teme, cu e forma cu henter e trayecto aki a encamina lo por resulta di un desaster mayor, cu ya caba nos ta pasando aden. Anto kizas pasando casi unanimamente, unda cu e contract lo bay horca e pueblo aki, y peor ainda generacionnan nos dilanti. Cada bes e informacionnan ta indica cu CITGO ta haya casi tur e beneficionan y cu Pais Aruba ta e garnachi. Pues Aruba lo ta e gran perdedor.
Sabiendo cu CITGO/PDVSA tambe ta den e “posicion di necesidad” urgente pa haya un upgrader pa blending di su imenso volumen di un producto di mal calidad y cu pa nan ainda ta capital morto, tabata e momento cu por a saca lo mihor for di e “posicion di necesidad” cu CITGO ta den.
Tampoco no tin e claridad necesario tocante e parti laboral. Ta wordo papia general riba cuanto hende local a solicita y cuanto hende for di exterior lo a solicita. Kico ta e condicionnan salarial? Esaki lo bay estilo di Green Corridor? Esta unda cu ta na Colombia ta paga e salario di trahadornan? Pues lo bay paga “cheap labor” Venezolano tambe? Al estilo di tempo di construccion di Sonesta? Ta incalcula kico lo ta efecto di mas hende di afor cu lo tin di wordo importa? Y si e trahadornan aki cu ta bin, lo permitinan bin cu nan famia? Esaki lo no contribui mas ainda na e destabilisacion di nos comunidad? Ya caba ta existi un presion riba nos comunidad pa e aumento di poblacion. Nos capacidad di carga ta parce cu ningun hende no ta teniendo cuenta cu ne. Pues Aruba ta manera un wea di steam, cu cualkier momento lo por explota. Ta straño cu ningun otro partido politico ta tene cuenta cu esaki, ya cu e por causanan voto den e proximo eleccion. Pasobra esnan cu tin derecho di voto lo no por trece nan familiares Aruba.

Manera UPP a mustra caba den un articulo anterior, e reunion aki a bira un show y un muestra di falta di transparencia. Manera Raad van Advies a bisa den su conseho, cu awor cu tur acuerdo y contract ta firma, ta bin “achteraf” pa pidi un apoderacion. Tambe nos por ripara cu Raad van Advies tabata tin su remarcanan riba e companianan cu ta wordo lanta pa tuma over e instalacionnan y pa despues huur nan. Tin remarca riba e sharesnan cu Aruba lo tuma over di Valero y cu gobierno kier bendenan bek cu e companianan tercera. UPP a yega di prensenta su opinion den pasado y nos ta keda para riba esakinan tambe, cu e fondonan, ganashinan cu e companianan aki bay haya, mester wordo hinca den un fondo pa enseñanza pa asina sirbi nos futuro generacionnan. Pero nos ta mira cu ta gobierno aki lo bay haya e entradanan aki, pa asina sigui haci su campaña politico pa otro aña y complace cu nan compinchi y finansistanan.
UPP ta kere cu un gran parti di nos pueblo no tin confianza den loke a wordo logra aki, esta un upgrader na lugar di un refineria completo, manera a wordo priminti. Mientras cu nos por mira un set di politiconan pleitando pa e honor, ya cu nan ta pensando mas riba e “next election” envez di e “next generation”.


Lider di UPP
C.A.S.D. Wever
27 di september 2016

Expresionnan haci den e articulo aki no necesariamente ta refleha opinion di ArenaPoliti.co